فلم ’سنجو‘ 300 کروڑ کے کلب میں شامل

 ممبئی: بالی ووڈ اداکار سنجے دت کی زندگی پر مبنی فلم’ سنجو‘ نے کامیابی کا سفر جاری رکھتے ہوئے 300 کروڑ روپے کا بزنس کرکے ایک اور سنگ میل عبور کرلیا۔

بالی ووڈ انڈسٹری پر تہلکہ مچانے والی سنجے دت کی زندگی پر بننے والی فلم ’سنجو‘ ان دنوں کامیابی کے سفر پر گامزن ہے اور اب تک متعدد ریکارڈ اپنے نام کرچکی ہے جب کہ اب ’سنجو‘ نے ایک اور سنگ میل عبور کرلیا۔

بھارتی میڈیا رپورٹس کے مطابق چاکلیٹی ہیرو رنبیر کپور کی فلم ’سنجو‘ 16ویں روز 300 کروڑ کے کلب میں شامل ہونے والی رنبیر کی واحد فلم بن گئی ہے اور یہ فلم 2018 میں سب سے زیادہ کمائی کرنے والی فلم بھی بن گئی ہے۔

بھارتی تجزیہ کار ترن ادارش نے سماجی رابطے کی ویب سائٹ ٹوئٹر پر فلم ’سنجو‘کے نئے ریکارڈ سے متعلق بتایا کہ فلم ’سنجو‘ تین ہفتوں میں 300 کروڑ روپے سے زائد کا بزنس کرکے بالی ووڈ کی کامیاب ترین فلموں کے مدمقابل آگئی ہے۔

بالی ووڈ میں اس سے قبل 300 کروڑ کے کلب میں شامل ہونے والی فلموں میں سلمان خان کی ’ بجرنگی بھائی جان‘، ’سلطان‘، ’ٹائیگر زندہ ہے‘ اور عامر خان کی ’پی کے‘ جیسی مشہور فلمیں شامل ہیں۔

ترن ادارش نے ایک اور ٹوئٹ میں فلم ’سنجو‘ کی دنیا بھر سے کمائی سے متعلق بھی بتایا کہ فلم توقعات سے بڑھ کر دنیا بھر میں تین ہفتوں کے دوران اب تک 500 کروڑ روپے سے زائد کا بزنس کرچکی ہے۔

یہ خبر بھی پڑھیں: راجکمار ہیرانی رنبیر کے ساتھ مزید 5 فلمیں کریں گے ؟ 

واضح رہے کہ راجکمار ہیرانی کی ہدایتکاری میں بننے والی فلم ’سنجو‘ میں رنبیر کپور کے ہمراہ منیشا کوئرالہ، سونم کپور،انوشکا شرما اور دیا مرزا مرکزی کردار ادا کیا ہے۔

The post فلم ’سنجو‘ 300 کروڑ کے کلب میں شامل appeared first on ایکسپریس اردو.

ایشوریارائے کا نیا گانا ’’ہلکا ہلکا سرور‘‘آتے ہی چھاگیا

ممبئی: نامور بالی ووڈ اداکارہ ایشوریا رائے بچن کی نئی فلم’’پھنے خان‘‘کا گانا ’’ہلکا ہلکاسرور‘‘آتے ہی چھا گیا یوٹیوب پر اس گانے کواب تک ایک کروڑ سے زائد افراد دیکھ چکے ہیں۔

اداکارہ ایشوریارائے بچن اورانیل کپور 17 سال بعد ایک ساتھ فلم’’پھنے خان‘‘میں نظرآئیں گے فلم میں ایشوریا رائے ایک راک اسٹار کا کردار اداکررہی ہیں۔ اس کردار کو نبھانے کے لیےایشوریا رائے ماضی کے کرداروں کی نسبت بالکل منفرد انداز میں نظر آئیں گی۔ یہی وجہ ہے کہ فلم کا انتظار شائقین بے چینی سے کررہے ہیں۔ فلم کا ٹریلر تو پہلے ہی مداحوں میں مقبول ہوچکا ہے گزشتہ روز فلم  کا  گانا’’ہلکا ہلکا سرور‘‘ریلیز کیا گیا ہے جسے یوٹیوب پر 24 گھنٹوں کے دوران تقریباً ایک کروڑ سے زائد بار دیکھا جاچکا ہے۔

اس خبرکوبھی پڑھیں: فلم ’’پھنے خان‘‘ کا ٹریلر جاری

دلچسپ بات یہ ہے کہ یہ گانا پاکستان کے لیجنڈ گلوکار نصرت فتح علی خان کی مقبول ترین قوالی’’ہلکا ہلکاسرور‘‘کا نیا ورژن ہے جسے ایشوریا رائے پر فلمایا گیا ہے۔ ایشوریا رائے فلم میں اس گانے کو پاپ انداز میں گاتی نظرآئیں گی۔

’’ہلکا ہلکاسرور‘‘کو بالی ووڈ کی نامور پلے بیک سنگر سنیدی چوہان نے گایا ہے جب کہ اس کے بول ارشاد کامل نے لکھے ہیں اور اسے امیت تریویدی نے کمپوز کیا ہے۔

واضح رہے کہ نصرت فتح علی خان کی اس قوالی کو پاکستان کے مقبول ترین گلوکار فرحان سعید نے بھی گایا ہے جسے لوگوں کی جانب سے بے حد پسند کیا گیا تھا۔

فلم ’’پھنے خان‘‘خان میں ایشوریا رائے اور انیل کپور کے علاوہ اداکار راجکمار راؤ بھی اداکاری کے جوہر دکھاتے ہوئے نظرآئیں گے فلم اگلے ماہ 3 اگست کو ریلیز کی جائے گی۔

The post ایشوریارائے کا نیا گانا ’’ہلکا ہلکا سرور‘‘آتے ہی چھاگیا appeared first on ایکسپریس اردو.

شاہ رخ خان کا تیزاب گردی کا شکار ہونے والی خواتین کے لیے بڑا قدم

ممبئی: بالی ووڈ کنگ شاہ رخ خان کی غیر منافع بخش تنظیم نے تیزاب گردی کا شکار ہونے والی خواتین کے لیے بڑا قدم اٹھاتے ہوئے ان کی پلاسٹک سرجری کرنے کا فیصلہ کیاہے۔

کروڑوں دلوں پر حکمرانی کرنے والے بالی ووڈ کنگ شاہ رخ خان بھارت سمیت پوری دنیا میں اپنی بہترین اداکاری کی وجہ سے شہرت رکھتے ہیں لیکن ان کی زندگی کے اس پہلو سے بہت کم لوگ واقف ہیں کہ وہ خواتین اور بچوں کے حقوق کے لیے سماجی طور پر بہت زیادہ سرگرم رہتے ہیں۔ شاہ رخ خان غیر منافع بخش تنظیم ’’میرفاؤنڈیشن‘‘ کے بانی ہیں جو تیزاب گردی کا شکار ہونے والی خواتین کے لیے بہت زیادہ سرگرم ہے۔  یہ فاؤنڈیشن تیزاب سے متاثرہ خواتین کو نہ صرف طبی سہولیات فراہم کرتی ہے بلکہ انہیں اپنے پیروں پر کھڑے ہونے میں بھی مدد دیتی ہے تاکہ یہ خواتین معاشرے میں ایک بار پھر سر اٹھاکر جی سکیں۔

اس خبرکوبھی پڑھیں: شاہ رخ خان غریب بچوں کے مسیحا

حال ہی میں شاہ رخ خان کی تنظیم میر فاؤنڈیشن نے تیزاب گردی کا شکار ہونے والی خواتین کے لیے بڑا اعلان کیا ہے۔ میڈیا رپورٹس کے مطابق میر فاؤنڈیشن نے ’’اتی جیون‘‘ فاؤنڈیشن اور نیو ہوپ اسپتال کے ساتھ مل کر تیزاب سے متاثرہ خواتین کے لیے پلاسٹک سرجری کا اہتمام کیاہے تاکہ یہ خواتین ایک بار پھر عام لوگوں کی طرح معاشرے میں سرا ٹھاکر جی سکیں۔ میر فاؤنڈیشن کی جانب سے یہ کیمپ13 سے 15 جولائی تک لگایا جائے گا جس میں ان تمام خواتین کو بہترین طبی سہولیات فراہم کی جائیں گی جو تیزاب گردی کا شکار ہوئی ہیں۔ ابتدائی مرحلے میں 44 خواتین کی پلاسٹک سرجری کی جائے گی۔

اس خبرکوبھی پڑھیں: خواتین اوربچوں کیلئے خدمات پرشاہ رخ خان کیلئے ایوارڈ

شاہ رخ خان کی پروڈکشن کمپنی ریڈ چلی کے سی ای او وینکی میسور کا کہنا ہے کہ ہماری فاؤنڈیشن گزشتہ کئی  سالوں سے  تشدد کا شکار خواتین  کو بااختیار بنانے کے لیے  کوشاں ہے۔  یہ فاؤنڈیشن متاثرین پر سے مالی بوجھ کم کرکے انہیں بہتر طبی سہولیات فراہم کرتی ہے۔ اس کے علاوہ یہ فاؤنڈیشن صرف تیزاب گردی کا شکار ہونے والی خواتین کی مدد ہی نہیں کرتی بلکہ  کمزوراور بے سہارا خواتین کو روزگار دلانے اور انہیں اپنے پیروں پرکھڑاہونے میں بھی مدددیتی ہےاوراس حوالے سے انہیں قانونی مشورے بھی فراہم کیے جاتے ہیں تاکہ یہ ایک بہتر اور خوشحال زندگی گزار سکیں۔

واضح رہے کہ رواں سال جنوری میں شاہ رخ خان کو میر فاؤنڈیشن کے ذریعے خواتین اور بچوں کے حقوق کے لیے خدمات سرانجام دینے پر کرسٹل ایوارڈ سے نوازا گیا تھا اس موقع پر شاہ رخ خان کا کہنا تھا کہ انہیں ایک چھوٹے سے کام کےلیے اتنا بڑا ایوارڈ لیتے ہوئے بہت خوشی محسوس ہورہی ہے۔

The post شاہ رخ خان کا تیزاب گردی کا شکار ہونے والی خواتین کے لیے بڑا قدم appeared first on ایکسپریس اردو.

فلموں میں منفرد اور مشکل ڈانس دکھایا جائے تو بہتر رسپانس مل سکتا ہے، سارہ لورین

لاہور: اداکارہ وماڈل سارہ لورین نے کہا ہے کہ پاپ میوزک اور رقص کے جدید انداز ان دنوں مغرب ہی نہیں بلکہ مشرقی ممالک میں بسنے والی نوجوان نسل کی اولین پسند بن چکے ہیں تاہم اگر منفرد اورمشکل ڈانس فلموں میں دکھائے جائیں توشائقین سے بہتررسپانس مل سکتا ہے۔

’’ایکسپریس‘‘ سے گفتگو کرتے ہوئے سارہ لورین نے کہا کہ ہمارے پڑوسی ملک بھارت میں بننے والی فلموں میں میوزک اوررقص پر خاص توجہ دی جاتی ہے جس کی بدولت فلموں کا بزنس کروڑوں نہیں بلکہ اربوں روپے کا ہوتا ہے۔ یہی نہیں بالی ووڈ میں تواب رقص کے شعبے کو اتنی اہمیت دی جانے لگی ہے کہ وہاں پر رقص کوموضوع بناکر فلمیں بنائی جارہی ہیں۔ اس کے علاوہ بھارتی ٹی وی چینلز رقص اورمیوزک سے وابستہ نوجوانوں کو بہترین مواقع فراہم کرنے کے لیے ایسے شوپیش کیے جاتے ہیں، جس میں شرکت کر کے باصلاحیت نوجوان فنکارراتوں رات سپراسٹار بن جاتے ہیں۔

اداکارہ نے کہا کہ اگر ہم پاکستان کی بات کریں توہمارے ہاں ایسے پروگرام نہ ہونے کے برابر ہیں۔ اس لیے ضروری ہے کہ ایک طرف توپرائیویٹ چینلز نوجوانوں کے فن کومتعارف کروانے کے لیے خصوصی پروگرام شروع کریں اور دوسری جانب ہمارے ہاں بننے والی جدید ٹیکنالوجی کی فلموں میں میوزک اور رقص کے شعبے پرخاص توجہ دی جائے۔ اس سلسلہ میں بیرون ممالک سے کوریوگرافروں کی خدمات حاصل کی جائیں توزیادہ بہترنتائج سامنے آئیں گے۔

The post فلموں میں منفرد اور مشکل ڈانس دکھایا جائے تو بہتر رسپانس مل سکتا ہے، سارہ لورین appeared first on ایکسپریس اردو.

سنجے دت کی بیٹی کا بالی ووڈ میں کام کرنے سے انکار

 ممبئی: بالی ووڈ اداکار سنجے دت کی بیٹی تریشالا دت نے کہا ہے کہ ان کا بالی ووڈ میں کام کرنے کا کوئی ارادہ نہیں۔ 

بالی ووڈ میں بابا کے نام سے مشہور سنجے دت کی پہلی بیٹی تریشالا دت سوشل میڈیا پر کافی متحرک رہتی ہیں اور وہ سماجی رابطے کی ویب سائٹس پر اپنے والد کی تصاویر شیئر کرکے ان کی حوصلہ افزائی کرتی رہتی ہیں لیکن ’’سنجو‘‘ کی ناقابل یقین کامیابی کے باوجود تریشالا کی جانب سے فلم یا اپنے والد سے متعلق کسی قسم کا ردعمل نہیں آیا تاہم اب انہوں نے سوشل میڈیا پر اپنے والد سنجے دت سے متعلق مداحوں کی جانب سے کیے گئے سوالوں پر خاموشی توڑ دی ہے۔

سوشل میڈیا ویب سائٹ انسٹا گرام پر ’’Ask me any question‘‘ کے حوالے سے ایک فیچر متعارف کرایا گیا ہے جس پر ایک مداح نے تریشالا سے سوال کیا کہ آپ کے اپنے والد سنجے دت کے ساتھ کیسے تعلقات ہیں اور والدین بغیر رہنا کیسا لگتا ہے جس کا انہوں نے جواب دیتے ہوئے کہا کہ میرے والد سنجے دت کے ساتھ ایسے ہی تعلقات ہیں جیسے ایک بیٹی کے اپنے والد کے ساتھ ہوتے ہیں اورمجھے والدین کے ساتھ رہنے کا کوئی احساس نہیں ہے کیوں کہ میں کبھی ان کے ساتھ نہیں رہی میں بچپن سے ہی اپنے نانا اور نانی کے ساتھ رہی ہوں۔

اس خبر کو بھی پڑھیں :سنجے دت کی بیٹی ’سنجو‘ سے ناخوش

ایک صارف نے سوال کیا کہ آپ اپنے والد جیسی ہیں یا والدہ ؟ انہوں نے جواب دیا کہ میرا غصہ اور رویہ اپنے والد جیسا ہے جب کہ نرم دلی اور محبت بھرا برتاؤ والدہ کی طرح ہے۔

ایک اور مداح نے سوال پوچھا کہ اگر بالی ووڈ سے آپ کو ایک اچھی فلم کی آفر آئے تو آپ کا کیا جواب ہوگا؟ تریشالا نے کہا ’’شکریہ میرا بالی ووڈ انڈسٹری میں جانے کا کوئی ارادہ نہیں ہے‘‘۔

واضح رہے سنجے دت کی پہلی شادی ریچا شرما سے ہوئی جن سے ان کی ایک ہی بیٹی تریشالا دت ہیں اور ان کی دوسری بیوی سے کوئی اولاد نہیں جب کہ ان کی تیسری بیوی منیاتا دت سے انہیں ایک بیٹا شاہران دت اور بیٹی اقرا دت ہیں۔

The post سنجے دت کی بیٹی کا بالی ووڈ میں کام کرنے سے انکار appeared first on ایکسپریس اردو.

پاکستان سے محبت کرتی ہوں، سونم کپور

ممبئی: نامور بالی ووڈ اداکارہ سونم کپور کا کہنا ہے کہ وہ پاکستانیوں سے بہت محبت کرتی ہیں اور پاکستان جانے کے لیے بے چین ہیں۔

اداکار انیل کپور کی صاحبزادی اداکارہ سونم کپور کی پاکستانیوں سے محبت سامنے آگئی۔ حال ہی میں انسٹاگرام کے نئے فیچر کو استعمال کرتے ہوئے سونم کپور نے اپنے مداحوں کی جانب سےپوچھے گئے سوالوں کے کافی دلچسپ جوابات دئیے۔ ایک مداح کی جانب سے سونم سے سوال پوچھا گیا کیا آپ مسلمانوں سے محبت کرتی ہیں؟ جس کے جواب میں سونم نے کہا’’میں تمام عقائد کے لوگوں سے پیار کرتی ہوں اور میرا مذہب بھی مجھے یہی سکھاتا ہے۔‘‘

اس خبرکوبھی پڑھیں: سونم کپور بھارت کا قومی ترانہ بھول گئیں

ایک اور پرستار نے سونم سے ان کے پاکستانی مداحوں کے حوالے سے سوال پوچھا کہ کیا آپ اپنے پاکستانی فالوورز سے محبت کرتی ہیں جس پر سونم نے کہا ’’میں پاکستان سے محبت کرتی ہوں، اور پاکستان جانے کے لیے بے چین ہوں۔‘‘

اس خبرکوبھی پڑھیں: سونم کپور کا ماہرہ خان کو دلچسپ جواب

سونم کپور کے والد انیل کپور کا تعلق پاکستان کے شہر پشاور سے ہے، ایک تقریب کے موقع پر انہوں نے بھی پاکستان آنے کی خواہش کا اظہار کرتے ہوئے کہا تھا کہ پشاور میں میرے آباؤاجداد کا گھر ہے،مجھے جب بھی موقع ملا پاکستان ضرور جاؤں گا۔

واضح رہے کہ سونم کپور پاکستانی اداکار فواد خان کی بہت اچھی دوست ہیں اور ان سے بے حد متاثر ہیں جب کہ فواد خان کو بالی ووڈ میں متعارف کرانے کا سہرہ بھی سونم کے سر ہی جاتا ہے۔

The post پاکستان سے محبت کرتی ہوں، سونم کپور appeared first on ایکسپریس اردو.

نوازشریف کی آمد، سینما گھروں اورتھیٹروں کا بزنس متاثر

لاہور: سابق وزیراعظم میاں نوازشریف کی برطانیہ سے پاکستان آمدنے لاہورمیں سینما گھروں اورتھیٹروں کا بزنس متاثرکردیا۔

ایک طرف شائقین کی بڑی تعداد کوئٹہ میں ہونے والے بم دھماکے کے بعد خوف وہراس کاشکاررہی تودوسری جانب موبائل فون سروس بند ہونے کی وجہ سے  فلم اوراسٹیج ڈرامہ دیکھنے والوں کی بڑی تعداد گھروں تک محدود رہی۔ جس کی وجہ سے اکثرسینما گھروں کے شو منسوخ کرنا پڑے، جبکہ اسٹیج ڈراموں کے پروڈیوسربھی شوچلانے یا بند رکھنے کی کشمکش سے دوچاررہے۔

اس صورتحال پرشوبز کے سنجیدہ حلقوں کا کہنا ہے کہ اسٹیج ڈراموں سے وابستہ فنکاروں اور تکنیکاروں کی بڑی تعداد ایسی ہے، جن کومعاوضہ اسی وقت ملتا ہے، جب وہ کام کرتے ہیں۔

لاہورمیں سابق وزیراعظم کے ’’استقبال‘‘ کیلیے نکالی جانے والی ریلی سے خوفزدہ ہوکرفیصل آباد، گوجرنوالہ، شیخوپورہ، اوکاڑہ اوردیگرشہروں سے آنے والے اسٹیج ڈراموں کے شائقین یہاں نہ پہنچ سکے۔

دوسری جانب توڑپھوڑکے خوف سے بھی اسٹیج ڈراموں کے شوز نہیں ہوسکے۔ اسی طرح  سینما گھروں کے شوز بھی ہنگامی صورتحال کے پیش نظرنہیں چلائے گئے۔ جس سے بہت سے لوگوں کو شدید مالی مشکلات کا سامنا کرنا پڑا۔

 

The post نوازشریف کی آمد، سینما گھروں اورتھیٹروں کا بزنس متاثر appeared first on ایکسپریس اردو.