فلم ’’بجرنگی بھائی جان‘‘ چین کے بعد ترکی میں بھی ریلیز

 ممبئی: بالی ووڈ کے دبنگ اداکار سلمان خان کی فلم ’’بجرنگی بھائی جان‘‘ کو چین میں کامیابی کے بعد ترکی میں بھی ریلیز کردیا گیا۔ 

بالی ووڈ فلموں کے لیے بھارت کے بعد چین بھی ایک بڑی انڈسٹری بن گئی ہے جہاں مداح سماجی مسائل پر بننے والی فلموں کو بے پناہ پسند کرتے ہیں یہی وجہ ہے کہ آج کل بالی ووڈ کے نامور اداکار اپنی فلم کو بھارت کے بعد چین میں بھی ضرور ریلیز کرتے ہیں۔

سلمان خان نے بھی اپنی فلم ’’بجرنگی بھائی جان‘‘ کو چین میں ریلیز کیا تھا جس نے کامیابی کے جھنڈے گاڑتے ہوئے بھارت سے زیادہ بزنس کیا اور گزشتہ ہفتے ہی انہوں نے اپنی بلاگ بسٹر فلم ’سلطان‘ کو بھی چین میں ریلیز کیا تھا اور اب انہوں نے ایک اور انڈسٹری کا رخ کرلیا ہے۔

بالی ووڈ کے سپر اسٹار سلمان خان نے اپنی فلم ’’بجرنگی بھائی جان‘‘ کی چین میں کامیابی کے بعد ترکی میں بھی ریلیز کرنے کا فیصلہ کیا جو درست ثابت ہوا اور ترکی میں بھی ان کی فلم کو بے حد پسند کیا گیا جب کہ مداحوں کی جانب سے سلو میاں کی اداکاری کو بھی سراہا گیا۔

The post فلم ’’بجرنگی بھائی جان‘‘ چین کے بعد ترکی میں بھی ریلیز appeared first on ایکسپریس اردو.

پہلی محبت اپنی اسکول ٹیچر سے ہوئی تھی، سلمان خان

ممبئی: بالی ووڈ کے سلطان سلمان خان نے اپنی بچپن کی محبت کے بارے میں انکشاف کرتے ہوئے کہا ہے کہ بچپن میں انہیں ان کی ٹیچر سے عشق ہوگیا تھا۔

بالی ووڈ کے مقبول کنوارے سلمان خان شادی سے دور بھاگتے ہیں لیکن انہوں نے اپنی زندگی میں عشق بہت کیے ہیں۔ حال ہی میں ٹی وی شو’’دس کادم‘‘کی شوٹنگ کے دوران جب سلو میاں سے ان کی پہلی محبت کے بارے میں پوچھاگیا توانہوں نے انکشاف کرتے ہوئے کہا کہ انہیں بچپن میں اسکول ٹیچر سے عشق ہوگیا تھا اوروہ اپنی ٹیچر کو روزانہ سائیکل پر گھر چھوڑنے جاتے تھے۔

اس خبرکوبھی پڑھیں: سلمان خان نے کوئی مدد نہیں کی

سلمان خان نے اپنی حرکتوں پر سے پردہ اٹھاتے ہوئے کہا کہ وہ اپنی سائیکل کا کیریئر ہٹادیا کرتے تھے تاکہ ان کی ٹیچر ان کے آگے بیٹھ سکے۔ سلو میاں نے مزید کہا یہ ناممکن ہے کہ کسی کو اپنی ٹیچر سے محبت نہ ہوئی ہو، بہت سے لوگ اس بات کا اقرار نہیں کرتے  لیکن میں یہ بات سب کے سامنے کہتا ہوں کہ مجھے بچپن میں ٹیچر سے محبت ہوگئی تھی۔

واضح رہے کہ اداکار سلمان خان ان دنوں فلم’’بھارت‘‘کی شوٹنگ میں مصروف ہیں جس میں ان کے ساتھ اداکارہ کترینہ کیف مرکزی کرداراداکررہی ہیں۔

The post پہلی محبت اپنی اسکول ٹیچر سے ہوئی تھی، سلمان خان appeared first on ایکسپریس اردو.

پریانکا کی منگنی میں شاہ رخ سمیت کئی فنکاروں کی عدم شرکت کا امکان

ممبئی: پریانکا چوپڑا کی منگنی کی تقریب میں بالی ووڈ کنگ شاہ رخ خان اور ایشوریارائے سمیت متعدد فنکاروں کی عدم شرکت کا امکان ہے۔

بھارتی میڈیا کے مطابق اداکارہ پریانکا چوپڑا اور امریکی اداکاروگلوکارنک جونز گزشتہ ماہ خفیہ  طور پر منگنی کرچکے ہیں اور اب 18 اگست کو منگنی کی باقاعدہ  تقریب منعقد کی جارہی ہے جس میں شرکت کرنے کے لیے نک جونز اپنے والدین سمیت ممبئی پہنچ گئے ہیں۔

میڈیا رپورٹس کے مطابق پریانکا کی منگنی کی تقریب میں بالی ووڈ کے متعدد فنکاروں کو بھی مدعو کیاجائےگا تاہم کچھ فنکار ایسے بھی ہیں جن کی تقریب میں عدم شرکت کا امکان ظاہر کیاجارہا ہے۔

شاہ رخ خان

شاہ رخ خان اور پریانکا چوپڑا کے درمیان نزدیکیوں کی خبریں کسی سے ڈھکی چھپی نہیں، ماضی میں دونوں ایک دوسرے کے انتہائی قریب تھے، تاہم شاہ رخ کی اہلیہ گوری خان کی مداخلت کے بعد دونوں میں علیحدگی ہوگئی۔ لیکن شاہ رخ خان کے دل میں آج بھی پریانکا کے لیے نرم گوشہ موجود ہے ، یہی وجہ ہے کہ پریانکا کی منگنی کی تقریب میں شاہ رخ خان شرکت نہیں کریں گے۔

اس خبرکوبھی پڑھیں: پریانکاچوپڑا کی منگنی؛ شاہ رخ خان آگ بگولہ

ایشوریا رائے بچن

ایشوریارائے بچن اور پریانکا چوپڑا کے تعلقات بھی ٹھیک نہیں ہیں، حال ہی میں ایشوریا کے شوہر ابھیشیک بچن نے اپنی بیوی کے کہنے پر پریانکا کے ساتھ پروجیکٹ کرنے سے انکار کردیا تھا، لہٰذا اس تقریب میں  ایشوریا رائے کی شرکت بھی غیر یقینی ہے۔

شاہد کپور

یہ بات شائقین کے لیے حیران کن ہوگی کہ ماضی میں شاہد کپور اور پریانکا چوپڑا کے درمیان تعلقات تھے بعد ازاں دونوں نے اپنے راستے جدا کرلیے، اس کے بعد سے ہی دونوں ایک دوسرے کو نظر انداز کرتے ہیں، یہی وجہ ہے کہ شاہد کپور بھی پریانکا کی منگنی میں شرکت نہ کریں۔

دپیکا پڈوکون

پریانکا اوردپیکا کے درمیان سرد جنگ سے پوری بالی ووڈ انڈسٹری واقف ہے لہٰذا بھارتی میڈیا کے مطابق  دپیکا پڈوکون بھی کل ہونے والی تقریب میں شرکت نہیں کریں گی۔

رنبیر کپور

بالی ووڈ کے چاکلیٹی ہیرو رنبیر کپور اور پریانکا کے درمیان کوئی اختلاف نہیں تاہم رنبیر اس وقت اپنی فلم ’براہمسترا‘ کی شوٹنگ کے سلسلے میں بیرون ملک موجود ہیں اور اسی لیے وہ پریانکا کی خوشیوں میں شریک نہیں ہوں گے۔

The post پریانکا کی منگنی میں شاہ رخ سمیت کئی فنکاروں کی عدم شرکت کا امکان appeared first on ایکسپریس اردو.

ہمایوں سعید عیدالضحیٰ پر ایک ساتھ 3 پاکستانی فلمیں ریلیز ہونے پر ناخوش

کراچی: اداکار ہمایوں سعید کا کہنا ہے کہ عیدالضحیٰ پرایک ساتھ 3 پاکستانی فلمیں ریلیز ہونے سے خوش نہیں ہوں۔

عید الضحیٰ پر مقامی سینماؤں میں تین فلمیں ریلیز ہورہی ہیں جن میں ہمایوں سعید اورفہد مصطفی کی ’’جوانی پھر نہیں آنی2‘‘، حمزہ علی عباسی کی’’پرواز ہے جنون‘‘اور فہد مصطفیٰ اورمہوش حیات کی فلم’’لوڈ ویڈنگ‘‘شامل ہیں۔

یہ تینوں بڑے بجٹ کی فلمیں ہیں جن کا انتظار شائقین بے چینی سے کر رہے ہیں تاہم ہمایوں سعید تینوں فلمیں ایک ساتھ ریلیز ہونے پر خوش نہیں ہیں۔

ہمایوں سعید نے حال ہی میں دیئے گئےانٹرویو میں اپنی فلم ’’جوانی پھر نہیں آنی2‘‘کے حوالے سے بتایا کہ اس فلم کی کہانی وہیں سے شروع ہوتی ہے جہاں سے فلم ’’جوانی پھر نہیں آنی‘‘ کی کہانی ختم ہوئی تھی، لیکن اس بار فلم میں پہلے سے زیادہ کامیڈی اور ڈراما شامل ہے جو دیکھنے والوں کو پسند آئے گا۔

اس خبرکوبھی پڑھیں: ’’جوانی پھر نہیں آنی2‘‘کی دھوم

ہمایوں سعید نے کہا کہ ایمانداری سے کہا جائے تو میں تینوں فلمیں ایک ساتھ ریلیز ہونے پر خوش نہیں ہوں کیونکہ تینوں فلمیں ایک ساتھ ریلیز ہونے کا اثر فلموں کے بزنس پر پڑے گا اور یہی دکھ کی بات ہے،  لیکن اب جب کہ فلمیں ریلیز ہورہی ہیں تو میں امید کرتا ہوں کہ یہ تینوں فلمیں شائقین کو پسند آئیں۔

اس خبرکوبھی پڑھیں: فلم ’جوانی پھر نہیں آنی 2‘ کا ٹریلرریلیز

واضح رہے کہ ہدایت کار ندیم بیگ کی فلم’’جوانی پھر نہیں آنی2‘‘میں اداکار ہمایوں سعید، فہد مصطفیٰ، احمد بٹ، واسع چوہدری، ماورا حسین، کبریٰ خان اور ثروت گیلانی شامل ہیں فلم عید الضحیٰ پر ریلیز کی جائے گی۔

The post ہمایوں سعید عیدالضحیٰ پر ایک ساتھ 3 پاکستانی فلمیں ریلیز ہونے پر ناخوش appeared first on ایکسپریس اردو.

فلموں میں اچھے ملبوسات اہم کردار ادا کرتے ہیں، مہرین سید

 لاہور:  اداکارہ وماڈل مہرین سید نے کہا ہے کہ فلموں میں حقیقت کے رنگ بھرنے کیلیے جس طرح کہانی اور کردار کا مضبوط ہونا ضروری ہوتا ہے اسی طرح ان کرداروں کے مطابق اگر ان کے ملبوسات بھی تیار کیے جائیں تو وہ ’سونے پہ سہاگہ ‘ کا کام کرتے ہیں۔

مہرین سید نے ’’ایکسپریس‘‘ سے گفتگو کرتے ہوئے کہا کہ یہ بات سمجھنے کی ہے کہ فنون لطیفہ کے مختلف شعبے کسی بھی ملک و قوم کے عکاس ہوتے ہیں جس طرح فلم اور ٹی وی ڈراموں کیلیے بہترین کہانی ضروری ہوتی ہے، اسی طرح کہانی کے مطابق کرداروں اور لوکیشنز کا انتخاب بھی بے حد ضروری ہوتا ہے۔ پھر ان کرداروں کے ملبوسات بھی اس علاقے کی بہترین عکاسی کرتے ہیں۔

اداکارہ نے کہا کہ ہمارے چاروں صوبے اپنی رسم و رواج، میوزک ، بولیوں اور ملبوسات کی وجہ سے اپنی ایک الگ پہچان رکھتے ہیں۔ جب ہم اپنے ملک یا دنیا کے کسی بھی خطے کی کہانی کو اپنی فلم یا ڈرامے میں پیش کرتے ہیں توضروری ہوجاتاہے کہ ہم وہاں کا کلچر بھی دکھائیں۔ جو صرف اورصرف ملبوسات کے ذریعے سامنے آسکتاہے۔

مہرین سید نے کہا کہ مغربی ممالک ہوں یا مشرقی ممالک ان کے ملبوسات میں فرق نمایاں ہے لیکن ان کی اپنی اپنی خوبصورتی ہے۔ یہی وجہ ہے کہ جب ہم فلموں اور ڈراموں میں کسی بھی ملک یا قوم کی عکاسی کرتے ڈریس دیکھتے ہیں تو ہمیں ان کے بارے میں جاننے کا موقع ملتا ہے۔ لیکن پاکستان فلم انڈسٹری میں اس پرکبھی توجہ نہیں دی گئی۔

اداکارہ نے کہا کہ ہمارے ہاں کردار کی ڈیمانڈ کوپورا ہی نہیں کیا جاتا۔ یہاں کام کرنیوالے لوگوں نے خود کوسب سے ’’قابل‘‘ سمجھ لیا ہے، اس لیے وہ کسی دوسرے کوکام کرنے کا موقع ہی نہیں دیتے۔ یہی وجہ ہے کہ لوگوں کو انٹرٹین کرنے والا شعبے سے وابستہ لوگ خود پریشان ہیں۔ کئی برسوں تک فلم انڈسٹری شدیدبحران کا شکاررہی، لیکن اب بہتری آرہی ہے۔ اس حوالے سے اگران چیزوں پر بھی کام کیا جائے تو معاملات بہتر ہوں گے اور شائقین فلم کوبھی بہترین تفریح فراہم ہوسکے گی۔

The post فلموں میں اچھے ملبوسات اہم کردار ادا کرتے ہیں، مہرین سید appeared first on ایکسپریس اردو.

ایشوریہ کا اپنی زندگی پر فلم بنانے سے متعلق انکشاف

 ممبئی: سابقہ مس ورلڈ ایشوریہ رائے نے اپنی زندگی پر مبنی فلم سے متعلق انکشاف کیا ہے۔ 

بالی ووڈ کی خوبرو اداکارہ ایشوریہ رائے بچن نے ایک انٹریو میں کہا کہ میں آرکیٹیکچر کی طالبہ تھیں جب مجھے مقابلہ حسن میں شامل ہونے کا موقع ملا جس کے بعد زندگی بدل سی گئی اور اگلے ہی مرحلے مجھے اپنی زندگی کی پہلی فلم آفر ہوئی جسے میں انکار نہ کرسکی اور یوں فلم نگری میں قدم رکھا۔

اپنی زندگی پر فلم بنانے سے متعلق ایشوریہ رائے کا کہنا تھا کہ ’میں نے کبھی خود کی زندگی پر فلم بنانے کا نہیں سوچا لیکن عین ممکن ہے کہ ایسا ہو بھی جائے کیوں کہ میں اس پر کام کرنا چاہتی ہوں لیکن سمجھ نہیں آتی کہ ابھی خود پر کتاب لکھنی چاہیے یا نہیں۔

سابقہ مس ورلڈ نے کہا کہ اہم بات یہ ہے کہ کہانی کو ویسا بیان کریں جو حقیقت پر مبنی یا حقیقیت کے قریب تر ہو ورنہ فائدہ نہیں جب کہ اپنی زندگی کے کچھ  واقعات کو دیکھتے ہوئے اپنی زندگی پر فلم ضرور بناؤں گی اور اگر میری زندگی پر دیکھنے کے قابل فلم بن سکتی ہے تو پھر میں پیچھے نہیں رہوں گی لیکن ابھی ایسا کوئی ارادہ نہیں۔

The post ایشوریہ کا اپنی زندگی پر فلم بنانے سے متعلق انکشاف appeared first on ایکسپریس اردو.

اذان سمیع فلم انڈسٹری میں انٹری کے لیے تیار

 لاہور: زیبا بختیار  کے بیٹے اذان سمیع خان فلم انڈسٹری میں انٹری کے لیے تیار ہیں۔

ان کی ایک تصویر سوشل میڈیا پر وائرل ہوئی ہے جس میں یہ نئے اور جاذب نظر انداز میں دکھے،اذان معروف اداکارہ زیبا بختیار اورگلوکار و موسیقار عدنان سمیع خان کے بیٹے ہیں۔

یہ بھی پڑھیں: فلم بنانا کسی کارنامہ سے کم نہیں، زیبا بختیار

اذان کی حالیہ وائرل تصویر اس بات کی نشاندہی کرتی ہے کہ اذان بہت جلد انڈسٹری کے اُفق پر روشن ستارے کے طور پر نمودار ہونے کو تیار ہیں۔

یہ تصویر ان کے میگزین فوٹو شوٹ میں سے ہے جس کو لندن میں شوٹ کیا گیا ہے، اس فوٹو شوٹ نے سوشل میڈیا پر کافی ہلچل مچائی ہے تاہم دیکھنا یہ ہے کہ اذان شائقین اور انڈسٹری کی توقعات پر پورے اتر پائیں گے یا نہیں۔

The post اذان سمیع فلم انڈسٹری میں انٹری کے لیے تیار appeared first on ایکسپریس اردو.