’’ میں شرمندہ ہوں‘‘

انسانیت کی تذلیل، سفاکی اور درندگی کا ایک اور واقعہ جس نے دنیا کو ہلا کر رکھ دیا۔

مقبوضہ کشمیر کی آٹھ سالہ آصفہ بانو کے ساتھ جنسی زیادتی اور اس کے قتل کی خبر منظرِ عام پر آئی تو ہر دل تڑپ اٹھا، ہر آنکھ اشک بار ہوگئی۔ بھارت میں جہاں مختلف سماجی حلقوں نے اس واقعے پر غم و غصے کا اظہار اور جنسی درندگی کے بڑھتے ہوئے واقعات کے خلاف مظاہرے کیے، وہیں بولی وڈ کے فن کار بھی آصفہ بانو کے لیے انصاف کا مطالبہ کررہے ہیں۔ سوشل میڈیا پر ’جسٹس فار آصفہ‘ ٹرینڈ کررہا ہے۔

آصفہ بانو کو اس سال جنوری میں اغوا کے بعد ایک مندر میں رکھا گیا تھا۔ اس دوران اسے جنسی زیادتی کا نشانہ بنایا گیا اور قتل کر کے لاش جنگل میں پھینک دی گئی۔ اس پر انسان دوست اور باشعور طبقے نے کھل کر یہ کہنا شروع کر دیا کہ بھارت میں مذہبی بنیاد پر نفرت پھیلائی جارہی ہے۔ آصفہ بانو ایک مسلمان چرواہے کی بیٹی تھی اور ریپ کے بعد بچی کا قتل دراصل مسلمانوں کو خوف زدہ کرنے کی کوشش ہے۔ بھارتی مسلمانوں کو جنونیوں نے یہ پیغام دیا ہے کہ وہ ہندوؤں کی زمینوں پر اپنے مویشی چرانا بند کردیں۔

آصفہ کی لاش ملنے کے بعد جب خبر نشر ہوئی تو اداکارہ کرینہ کپور نے سوشل میڈیا پر اپنی ایک تصویر پوسٹ کی۔ انہوں نے اپنے ہاتھوں میں پلے کارڈ اٹھایا ہوا تھا جس پر لکھا تھا۔

’’میں ہندوستان ہوں اور میں شرمندہ ہوں۔ ہمارے بچوں کو انصاف دو۔ آصفہ کو انصاف دو۔‘‘ یہ تصویر وائرل ہوگئی اور ہر طرف ہنگامہ کھڑا ہو گیا۔ سوشل میڈیا پر جہاں کرینہ کپور کو برا بھلا کہنے اور طنز کرنے والوں کی کوئی کمی نہ تھی، وہیں بالی وڈ کے دوسرے فن کار بھی کرینہ کے حق میں بول پڑے اور تنقید کرنے والوں کو آڑے ہاتھوں لیا۔

ٹوئٹر پر ایک صارف ہرش وردھن نے کرینہ کو مخاطب کرتے ہوئے کہا کہ انہیں ہندو ہونے کے باوجود ایک مسلمان سے شادی کرنے اور بیٹے کا نام تیمور رکھنے پر شرمندہ ہونا چاہیے۔ جس کا جواب اداکارہ سوارا بھاسکر نے یوں دیاکہ ’’ آپ کو اپنے وجود پر شرمندہ ہونا چاہیے۔ خدا نے آپ کو دماغ دیا جس میں آپ نے نفرت بھر لی اور منہ دیا جو غلاظت سے بھر دیا۔ آپ بھارت اور ہندو دونوں کے لیے شرمندگی کا باعث ہیں۔‘‘

سونم کپور نے بھی سوشل میڈیا پر ایک پوسٹ میں کرینہ کپور کی حمایت کی اور ان پر تنقید کرنے والوں کو شرم دلائی۔ بالی وڈ اداکارہ ہما قریشی نے بھی کرینہ کی طرح ’میں ہندوستان ہوں‘ کا پلے کارڈ اٹھا کر آصفہ بانو کے حق میں آواز بلند کی اور کرینہ کپور سے اظہار یک جہتی کیا۔

اسی طرح عامر خان، شاہ رخ خان، پریانکا چوپڑا، انوشکا شرما اور سنجے دت نے بھی آصفہ کے قتل پر شدید غم و غصے کا اظہار کیا۔ پریانکا چوپڑا نے ٹوئٹر پر اپنے پیغام میں کہا کہ آصفہ کی طرح اور کتنے بچے مذہب اور سیاست کے نام پر قربان کیے جائیں گے؟ ان کا کہنا تھا کہ میں بہت شرمندہ ہوں اور یہ وقت سخت ایکشن لینے کا ہے، ہم آصفہ اور انسانیت کے مقروض ہیں۔

بالی وڈ سپر اسٹار سجنے دت نے کہا کہ ہمارا معاشرہ ناکام ہو چکا ہے اور 8 سالہ بچی کے ساتھ جو واقعہ پیش آیا اس پر بہ حیثیت والد میں غصے سے بھرا ہوا ہوں۔ انہوں نے مزید کہا کہ میری ہم دردیاں آصفہ کے خاندان کے ساتھ ہیں۔انوشکا شرما نے اپنے پیغام میں کہا کہ آصفہ کی بے حرمتی اور قتل شیطانیت کی بدترین مثال ہے۔ عامر خان نے اس واقعے پر گہرے دکھ اور افسوس کا اظہار کرتے ہوئے کہا کہ آصفہ کی بے حرمتی اور قتل پر میرا دل رو رہا ہے اور یہ واقعہ انسانیت کی توہین ہے۔

The post ’’ میں شرمندہ ہوں‘‘ appeared first on ایکسپریس اردو.

میرا فلم انڈسٹری میں جنسی استحصال پر کتاب لکھیں گی

 لاہور:  فلم اسٹارمیرا نے فلم انڈسٹری میں لڑکیوں کے ساتھ ہونے والے جنسی استحصال بارے کتاب لکھنے کا فیصلہ کیا ہے۔

اداکارہ میرا نے ’’ایکسپریس‘‘سے بات کرتے ہوئے کہا کہ فلم انڈسٹری میں ہر لڑکی کو بلیک میل کر کے زیادتی کا نشانہ بنایا جاتا ہے اور یہاں خواتین کے ساتھ وہ کچھ ہوتا جو ناقابل بیان ہے۔ یہی وجہ ہے کہ بازار حسن کے علاوہ اچھی فیملی سے تعلق رکھنے والی لڑکیاں یہاں آنا پسند نہیں کرتیں۔

میرا کا کہنا تھا کہ میں اس بارے میں بہت جلد کتاب لکھوں گی جس میں وہ تمام راز افشا کروں گی جو آج تک میرے سینے میں دفن ہیں، میری کتاب میں بہت سے ایسے لوگوں کے چہرے سامنے آئیں گے، جوبظاہربہت شریف ہیں۔ اور جب میرا منہ کھلے گا پھر سب کے منہ بند ہوجائیں گے اور لوگوں کے سامنے تمام حقائق آئیں گے۔

اداکارہ نے مزید کہا کہ شوبز کی لڑکیوں کو جنسی طور پر نہ صرف پاکستان بلکہ انڈیا میں بھی ہراساں کیا جاتا ہے لیکن پہلے لڑکیاں خاموش رہتی تھیں اوراب وہ بولنا شروع ہوگئی ہیں اور میرے خیال میں یہ بالکل درست ہے جو لوگ شوبز کی لڑکیوں کے ساتھ ایسا کرتے ہیں ان کے بارے میں سب کو پتہ چلنا چاہیے تاکہ دوبارہ کسی کو ایسا کرنے کی ہمت نہ ہو۔

میرا نے کہا کہ شوبز کے علاوہ زندگی کے مختلف شعبوں میں بھی یہ سلسلہ بہت پرانا ہے۔ مگراب سوشل میڈیا کی بدولت خواتین کوآواز بلند کرنے کا ایک بہترین سہارا میسر آچکا ہے اوراب اس سے خواتین کو بہت فائدہ پہنچے گا۔

The post میرا فلم انڈسٹری میں جنسی استحصال پر کتاب لکھیں گی appeared first on ایکسپریس اردو.

علی ظفر اور میشا شفیع کی مائیں بھی میدان میں آ گئیں

 اسلام آباد: گلوکار علی ظفر پر ہراساں کرنے کا الزام عائد کرنے والی گلوکارہ میشا شفیع کی حمایت میں پی ٹی آئی چیئرمین عمران خان کی سابق اہلیہ ریحام خان اور تحریک انصاف کی منحرف ایم این اے عائشہ گلالئی بھی میدان میں آ گئیں۔

ریحام خان نے ٹویٹر پر اپنے پیغام میں کہا کہ مجھے اس باہمت خاتون پر فخر ہے۔ یہ میری راک اسٹار ہے۔ ایسی خواتین کو مزید طاقت ملے جو ایسی شکایتوں یا ایسے رویوں کیخلاف اْٹھ کھڑی ہوتی ہیں۔

دوسری طرف عائشہ گلالئی نے اپنے ٹو ئٹر پیغام میں اس بات پر خوشی کا اظہار کرتے ہو ئے کہا ہے کہ خواتین نے خاموشی توڑی اور جنسی ہراسگی کے خلاف کھڑے ہونے کا فیصلہ کیا ہے۔ انہوں نے کہا کہ جنسی ہراساں کرنے والوں کے نام منظر عام پر لائے جانے چاہئیں اور انہیں سخت سرا دینی چاہیے۔

خیال رہے کہ گزشتہ برس عائشہ گلالئی نے اس وقت ملکی سیاست میں ہلچل مچادی تھی جب انہوں نے چیئرمین پی ٹی آئی عمران خان پر جنسی ہراسگی کا الزام عائد کیا تھا۔ عمران خان پر الزامات عائد کرنے کے بعد عائشہ گلالئی نے تحریک انصاف کو خیر باد کہہ کر اپنی سیاسی پارٹی ’ تحریک انصاف گلالئی‘ قائم کرلی تھی۔

دریں اثنا گلوکارہ میشا شفیع کے بعد مزید3خواتین نے بھی علی ظفر پر جنسی ہراس کا الزام عائد کردیا۔ سوشل میڈیا پر پیغامات میں ان خواتین نے گلوکار پر نازیبا حرکات کرنے کا دعویٰ کرتے ہوئے کہا کہ میشا شفیع نے خاموشی توڑ کر بہادری کا کام کیا ہے۔

لاہور کی ایک خاتون لیکچرار ماہم جاوید نے علی ظفر پر الزام لگایا کہ کئی سال قبل گلوکار نے زبردستی ان کی کزن کے قریب آنے کی کوشش کی۔ شوبز سے وابستہ ایک میک اپ آرٹسٹ لیناغنی نے دعویٰ کیا کہ کئی مواقع پرعلی ظفر نے حد سے تجاوز کیا اور اخلاق سے گری گفتگو کی۔

خاتون بلاگر حمنہ رضا نے بھی اپنے سوشل میڈیا اکاؤنٹ پر الزام عائد کیا کہ ایک تقریب کے دوران علی ظفر نے سیلفی لیتے ہوئے ان سے غیر اخلاقی حرکت کی تھی۔

دریں اثنا معروف اداکارہ وماڈل عائشہ عمر نے انکشاف کیا ہے کہ انہیں بھی جنسی طور پر ہراساں کیا گیا۔ فلمسٹار نور نے کہا ہے کہ شوبز سے وابستہ خواتین اگر جنسی ہراساں کرنے والوں کے نام لیں دیں تو اگلے ہی دن نا جانے کتنے لوگوں کی طلاق ہو جائے۔ واضح رہے کہ علی ظفراورمیشاشفیع کے معاملے نے شوبز انڈسٹری کے مختلف فنکاروں کوتقسیم کردیاہے۔

سوشل میڈیا پرجہاں بہت سے معروف فنکاروں نے علی ظفرکی شخصیت کوپارسا قراردیاہے، وہیں بہت سے لوگ میشاشفیع کی جراٗت کو سلام کر رہے ہیں۔ ۔ معروف اداکار فخرعالم نے سماجی رابطوں کی ویب سائٹ ٹویٹر پر اس اہم مسئلے پر ردعمل دیتے ہوئے لکھا کہ میں میشا شفیع اور علی ظفر دونوں کو جانتا ہوں ،میں امید کرتا ہو ں کہ یہ ایک غلط فہمی ہو ۔

علی ظفر کی آنے والی پاکستانی فلم ’طیفا ان ٹربل‘ میں ان کی کوسٹار مایا علی نے اپنے انسٹاگرام اکاؤنٹ پر علی ظفر کے ٹویٹ کے اسکرین شاٹ کے ساتھ لکھا کہ میں کسی کو غلط نہیں کہہ رہی لیکن مجھے کبھی علی ظفر کے رویے سے ایسا محسوس نہیں ہوا۔ اسی طرح صنم تاثیر نے بھی علی ظفر کی حمایت میں ٹویٹ کیا۔

مزید براں گلوکارہ میشا شفیع اور اداکار علی ظفر کے درمیان جنسی ہراس کے معاملے پردونوں کی مائیں بھی میدان میں آ گئیں۔ میشا شفیع کی والدہ اداکارہ صبا حمید نے کہا ہے کہ وہ اپنی بیٹی کی مکمل سپورٹ کرتی ہیں جبکہ علی ظفر کی والدہ ڈاکٹر کنول نے کہا ہے کہ مرد کی بھی عزت ہوتی ہے۔

The post علی ظفر اور میشا شفیع کی مائیں بھی میدان میں آ گئیں appeared first on ایکسپریس اردو.

’’جراسک ورلڈ: فالن کنگڈم‘‘ کا فائنل ٹریلر جاری

لاس اینجلس: ہالی ووڈ کی سائنس فکشن  فلم سیریز ’’جراسک پارک‘‘ کی نئی فلم  ’’جراسک ورلڈ: فالن کنگڈم‘‘ کا آخری ٹریلر اور پوسٹر جاری کر دیا گیا۔

اس فلم کی ہدایت کاری کے فرائض معروف ہدایت کار جے اے بیونا نے انجام دئیے  ہیں فلم کی کاسٹ میں ایک بار پھر کرِس پریٹ ، برائس ڈلاس ہاورڈ اور جیف گولڈ بلم اپنے سابقہ کرداروں میں ہیں جبکہ دیگر کاسٹ میں بی ڈی وونگ، ٹوبی جونز، ریف اسپال، جسٹس اسمتھ، ڈینیئالا پلیڈا، ٹیڈ ولین، گیریلڈین چیلپن اور جیمز کرومویل شامل ہیں۔

فرینک مارشل اور پیٹرک کرولی کی مشترکہ پروڈکشن میں بننے والی اس فلم کی کہانی گزشتہ فلموں کی طرح اس بار بھی شہر سے دور جزیرے پر قائم  ایک ایسے تھیم پارک کے گِرد گھوم رہی ہے جسے تباہ ہوئے 22 سال سے زیادہ بیت چکے ہوتے ہیں تاہم حفاظتی اقدامات مزید سخت کرتے ہوئے اسے ایک بار پھر سے تعمیر کیا جاتا ہے۔

یہ فلم یونیورسل پکچرز کے تحت 22 جون کو سنیما گھروں میں عام نمائش کے لیے پیش کی جائے گی۔

The post ’’جراسک ورلڈ: فالن کنگڈم‘‘ کا فائنل ٹریلر جاری appeared first on ایکسپریس اردو.

سنیل گروور سلمان خان کی فلم ’بھارت‘ میں کاسٹ 

 ممبئی: بالی ووڈ کامیڈین واداکار سنیل گروور اپنے نئے شو ’ دھن دھنا دھن‘ کی کامیابی کے بعد سلمان خان کی ’بھارت‘ میں جلوہ گر ہوں گے۔

بھارت کے مقبول ترین شو ’کامیڈی نائٹ ود کپل‘ میں گتھی اور ڈاکٹر مشہور گولاٹی کے کرداروں سے شہرت کی بلندیوں کو چھونے والے اداکار سنیل گروور کپل شرما سے لڑائی کے بعد پے در پے کامیابیاں سمیٹ رہے ہیں، کپل شرما سے ناراضگی اور ’دی کپل شرما شو‘ کے بند ہوجانے کے بعد جہاں کپل کو دوسرے شو میں ناکامی کا سامنا کرنا پڑا وہی سنیل گروور کے شو ’دھن دھنا دھن‘ کو خوب پذیرائی مل رہی ہے۔

سنیل گروور کی بڑھتی مقبولیت کو دیکھتے ہوئے انہیں ہدایت کار وشال بھردواج نے اپنی کامیڈی فلم ’چُھریاں‘ میں مرکزی کردار میں کاسٹ کیا جو ان کی دوسری سولو فلم ثابت ہوگی، اگرچہ وہ ’گجنی‘ ، ’ہیروپنتی، ’ضلع غازی آباد‘، گبر از بیک اور باغی جیسی کامیاب فلموں میں کام کرچکے ہیں لیکن ان میں وہ مختصر کردار میں ہی دکھائی دیے جب کہ ان کی پہلی فلم ’کافی ود ڈی‘ ناکامی سے دوچار ہوئی تھی۔

بھارتی میڈیا رپورٹس کے مطابق سنیل گروور کو اب بالی ووڈ کے سلطان کی فلم ’بھارت‘ میں کاسٹ کرلیا گیا ہے جہاں وہ سلمان خان کے قریبی دوست کا کردار ادا کریں گے جب کہ ان کا یہ کردار ان کی اب تک کی تمام فلموں سے دلچسپ اور اہم ہوگا۔

کپل شرما کی سابقہ گرل فرینڈ اور سنیل گروور کی کریٹو ڈائریکٹر پریتی سوموز نے بھی سماجی رابطے کی ویب سائٹ انسٹاگرام پر اس خبر کی تصدیق کرتے ہوئے اداکار کو مبارکباد دی اور کہا کہ انتہائی محنت اور صبر کے ساتھ مثبت سوچ تمہیں اپنی منزل اور مقصد کے قریب لارہی ہے جو تم حاصل کرنا چاہتے ہو۔ سلمان خان کے ساتھ فلم کرنے پر پریتی نے سنیل کو مخاطب کرتے ہوئے کہا کہ داصل تم اب ایک خوش قسمت انسان ہو۔

واضح رہے کہ فلم ’بھارت‘ سلمان خان کی اب تک کی سب سے بڑی بجٹ کی فلم ہوگی جو 2018 میں عید کے موقع پر سینما گھروں کی زینت بنے گی۔

The post سنیل گروور سلمان خان کی فلم ’بھارت‘ میں کاسٹ  appeared first on ایکسپریس اردو.

میشا شفیع اور علی ظفر کی لڑائی کا بھید کھل گیا

 لاہور: گلوکارہ میشا شفیع اور مشہور اداکار و گلوکار علی ظفر کے درمیان لڑائی کی اصل وجہ سامنے آگئی ہے۔

مشہور گلوکارعلی ظفر اور میشا شفیع میں ایک نجی ٹی وی شو کے معاوضہ پر لڑائی ہوئی، ذرائع کا کہنا ہے کہ نجی ٹی وی چینل نے شو میں علی ظفر اور میشا شفیع کو بطور جج سائن کیا جب کہ میشا شفیع نے نجی ٹی وی کے پروڈیوسر سے علی ظفر کے برابر معاوضہ طلب کیا جس پر پروڈیوسر نے علی ظفر کو راک اسٹار کہتے ہوئے برابر معاوضہ دینے سے انکار کردیا۔

اس خبر کو بھی پڑھیں : میشا شفیع کا معروف گلوکار علی ظفر پر جنسی ہراسانی کا الزام

ذرائع کا کہنا ہے کہ پروڈیوسر کی جانب سے علی ظفر کے برابر معاوضہ دینے سے انکار پر شو کی 8 اقساط کے بعد میشا شفیع غصہ میں شو چھوڑ کرچلی گئیں اور اس کے کچھ دن بعد انہوں نے علی ظفر پر جنسی ہراسانی کا الزام لگایا۔

اس خبر کو بھی پڑھیں : علی ظفر نے میشا شفیع کے الزامات مسترد کردیے

واضح رہے کہ گزشتہ روز گلوکارہ میشا شفیع نے مشہور گلوکار و اداکار علی ظفر پر جنسی ہراسانی کا الزام عائد کرتے ہوئے کہا کہ انہیں کسی اور نے نہیں بلکہ انڈسٹری سے تعلق رکھنے والے مشہور گلوکار علی ظفر نے ایک سے زائد بار جنسی طور پر ہراساں کیا۔

The post میشا شفیع اور علی ظفر کی لڑائی کا بھید کھل گیا appeared first on ایکسپریس اردو.

ماہرہ خان بھی جنسی ہراسانی کیخلاف بول پڑیں

کراچی: نامورپاکستانی اداکارہ ماہرہ خان نے میشا شفیع کی جانب سے علی ظفر پر جنسی ہراسانی کے الزام پر کہا ہے کہ اس مسئلے پر سنجیدگی سے بات کرنے کی ضرورت ہے۔

پاکستان شوبز انڈسٹری کی نامور گلوکارہ و اداکارہ میشا شفیع نے گزشتہ روز ایک ٹویٹ میں علی ظفر پر جنسی ہراسانی کا سنگین الزام لگایا تھا۔ میشا شفیع کے الزامات کے بعد سوشل میڈیا پر دیگر فنکاروں کی جانب سے ملے جلے ردعمل کا اظہار کیا جارہا ہے۔

اس خبرکوبھی پڑھیں: میشا شفیع کا علی ظفر پر جنسی ہراسانی کا الزام

اداکارہ ماہرہ خان نے بھی اس معاملے پر اپنی رائے کا اظہار کیا ہے۔ تاہم انہوں نے میشا شفیع یا علی ظفر کا نام لیے بغیر سوشل میڈیا پر جنسی ہراسانی جیسے سنجیدہ معاملے پر تبصرے کرنے والے لوگوں کو آڑے ہاتھوں لیتے ہوئے کہا ہے کہ بیمار ذہنیت والے اس معاملے پر تبصرہ کررہے ہیں جس سے ظاہر ہے کہ مسئلہ دراصل ان کے دماغوں میں ہے۔ اگر ہم اس معاملے کو تبصرے کرکے کمزور کرتے رہیں گے تو یہ سلسلہ اسی طرح جاری رہے گا۔

واضح رہے کہ گزشتہ روز میشا شفیع نے علی ظفر پر انہیں ایک سے زائد بار جنسی طور پر ہراساں کرنے کا الزام لگایا تھا۔ میشا شفیع کے الزامات پر سوشل میڈیا صارفین کے ساتھ شوبز سے تعلق رکھنے والے فنکاروں نے بھی اپنے ردعمل کا اظہار کیا۔

اس خبرکوبھی پڑھیں: جنسی ہراسانی الزام، مایا علی بھی بول پڑیں

جنسی ہراسانی کے الزامات پر کچھ اداکار میشا شفیع کو درست قرار دے رہے ہیں جب کہ کچھ لوگ علی ظفر کے ساتھ کھڑے نظر آرہے ہیں تاہم ایک بات جس پر تمام لوگ متفق ہیں وہ ہے کہ واقعے کی مکمل طور پر تحقیقات ہونی چاہئیں۔

The post ماہرہ خان بھی جنسی ہراسانی کیخلاف بول پڑیں appeared first on ایکسپریس اردو.