فلم ارتھ 2 کا ٹریلر ریلیز؛ شان کی جانداراداکاری نے دل جیت لیے

تمام فنکاروں کی جاندار اداکاری کی چھوٹی سی جھلک نے واضح کردیا کہ یہ عالمی سطح کی فلم ہے۔ فوٹوفائل

تمام فنکاروں کی جاندار اداکاری کی چھوٹی سی جھلک نے واضح کردیا کہ یہ عالمی سطح کی فلم ہے۔ فوٹوفائل

کراچی: پاکستانی سپراسٹار شان شاہد اور حمائمہ ملک کی فلم ’’ارتھ 2 ‘‘کا ٹریلر ریلیز کردیا گیا جس میں کہانی کو جاندار انداز میں پیش کیا گیا ہے۔

نامور پاکستانی اداکار شان شاہد کی فلم ’’ارتھ 2 ‘‘کا انتظاران کے چاہنے والے بے صبری سے کررہے تھے، اس فلم کے ذریعے شان طویل عرصے بعد فلموں میں واپسی کررہے ہیں۔ یہی وجہ ہے کہ ان کے مداحوں سمیت شوبزسے وابستہ تمام افراد کو اس فلم کا بے صبری سےانتظار تھا۔ اب یہ انتظار ختم ہوا۔ گزشتہ روز فلم کا ٹریلر ریلیز کیا گیا ہےاور بلا شبہ یہ کہنا غلط نہ ہوگا کہ یہ ٹریلربھارتی فلم کے ٹریلر سے کسی بھی طرح کم نہیں۔

اداکار شان شاہد پاکستان شوبز انڈسٹری کا وہ ہیرا ہیں جن کی چمک کبھی ماند نہیں پڑتی، شان کردار میں ڈوب کر اداکاری کرتے ہیں۔ٹریلر میں ان کی اور فلم میں شامل تمام فنکاروں کی جانداراداکاری کی چھوٹی سی جھلک نے واضح کردیا کہ یہ  فلم انٹرنیشنل لیول پر بنائی گئی ہے۔

فلم ’’ارتھ2‘‘ دراصل 1982 میں ریلیز کی گئی بھارتی فلم ’’ارتھ‘‘ کا پاکستانی ورژن ہے، فلم ’’ارتھ‘‘ کے خالق مہیش بھٹ تھے جب کہ فلم میں مرکزی کردار شبانہ اعظمی، سمیتا پاٹیل، راج کرن اور کل بھوشن کھربندا نے ادا کئے تھے۔ پاکستانی فلم ’’ارتھ 2‘‘ میں شان شاہد، حمائمہ ملک، عظمیٰ حسن  اور محب مرزا نےمرکزی کردارنبھایا ہے۔  ٹریلر میں تمام اداکاروں کی پرفارمنس کو بھرپورانداز میں پیش کیاگیاہے۔

تقریباً 3 منٹ پر مشتمل ٹریلر کو دیکھ کر فلم کی کہانی کافی حد تک سمجھ میں آجاتی ہے۔ فلم چارمختلف پیشوں سے وابستہ افراد کی ناکامیوں، کامیابیوں اوران کی ازدواجی زندگی میں آنے والے اتار چڑھاؤ کے گرد گھومتی ہے۔ ٹریلر کو دیکھ کر اندازہ لگانا قطعی مشکل نہیں کہ چاروں اداکاروں نے اپنے اپنے کرداروں سے مکمل انصاف کیا ہے۔ فلم کی زیادہ ترشوٹنگ پاکستان میں ہوئی ہے لیکن کہانی کی ڈیمانڈ کے مطابق برطانیہ میں بھی فلم کی عکسبندی کی گئی ہے۔

ایک انٹرویو کے دوران اداکارہ حمائمہ ملک نے اپنے کردار کے حوالے سے بات کرتے ہوئے کہا تھا کہ ہر فنکار یہ خواہش کرتا ہے کہ اس کے کیرئیر کے دوران کچھ ایسا کام ضرور ہو جو اس کی پہچان بن جائے اور لوگ برسوں اسے اس کردار کے حوالے سے یاد رکھیں لہٰذاجب اداکار شان نے مجھے یہ کردار پیش کیا تو میں نے فوراً اس فلم کا حصہ بننے کا فیصلہ کرلیا۔

اداکار شان مہیش بھٹ کی فلم ’’ارتھ‘‘ سے اتنے زیادہ متاثر تھے کہ 2015 میں انہوں نے مہیش بھٹ سے ملاقات کے دوران فلم ’’ارتھ‘‘ کا پاکستانی ری میک بنانے کی خواہش ظاہر کی تھی اور مہیش بھٹ نے انہیں بلا معاوضہ ری میک بنانے کی اجازت دے دی تھی۔

واضح رہے کہ فلم کی کہانی جدید دور کے مطابق ڈھالی گئی ہے، موجودہ دور کے شائقین کو مدنظررکھتے ہوئے فلم کا پس منظر 2017 کے مطابق ترتیب دیاگیا ہے۔ اداکار شان سمیت فلم میں شامل تمام اداکاروں کی محنت اور جانداراداکاری سے بھرپور فلم ’’ارتھ 2‘‘رواں سال 21 دسمبر کو ریلیز کی جائے گی۔

نرگس اور ندا چوہدری میں 9 برس بعد صلح ہوگئی

اختلافات اورجھگڑے توحقیقی بہن بھائیوں میں بھی ہوجاتے ہیں، مگراتفاق ہے کہ ہمارے اختلافات کوزیادہ وقت گزرگیا، نرگس۔ فوٹو: فائل

اختلافات اورجھگڑے توحقیقی بہن بھائیوں میں بھی ہوجاتے ہیں، مگراتفاق ہے کہ ہمارے اختلافات کوزیادہ وقت گزرگیا، نرگس۔ فوٹو: فائل

 لاہور:  اداکارہ نرگس اور ندا چوہدری میں 9برس بعد صلح ہوگئی۔

ڈرامے کے پروڈیوسر اسحاق چوہدری نے گزشتہ روز محفل تھیٹرمیں ایک تقریب کا انعقاد کیا جس میں دونوں اداکاراؤں کی صلح کی خوشی کو بھرپور اندازسے منانے کے لیے محفل تھیٹرمیں جہاں آتشبازی ہوئی، وہیں دونوں کو بگھی میں بٹھا کر تھیٹر لایا گیا، جبکہ ڈھول کی تھاپ پرگھوڑوں کا روایتی رقص بھی پیش کیا گیا۔ اس موقع پراسٹیج ڈراموں کے کیری پیکرسخی سروربٹ، بلال چوہدری، طاہرنوشاداورہنی شہزادی سمیت دیگرموجود تھے۔

اس موقع پرمیڈیا سے گفتگو کرتے ہوئے نرگس کا کہنا تھا کہ اختلافات اورجھگڑے توحقیقی بہن بھائیوں میں بھی ہوجاتے ہیں، مگراتفاق ہے کہ ہمارے اختلافات کوزیادہ وقت گزرگیا۔ لیکن اب ہم نے تمام رنجشیں بھلا کرآگے قدم بڑھایا ہے۔

دوسری جانب ندا چوہدری نے کہا کہ نرگس میری سینئر ہیں اوران کے ساتھ بہت کام کیا۔ میں ان کی پہلے بھی عزت کرتی تھی اورآج بھی اسی طرح کرتی ہوں۔ ہم دونوںمل کرتھیٹرکی دنیامیں ایسا ڈرامہ پیش کرینگے، جس کولوگ برسوں یاد رکھیں گے۔

عامر خان نے فلم ’’روبورٹ‘‘ کے سیکوئل میں کام کرنے سے کیوں انکار کیا؟

 رجنتی کانت کی جگہ اس انڈسٹری میں کوئی بھی نہیں لے سکتا، مسٹر پرفیکشنسٹ فوٹو: فائل

رجنتی کانت کی جگہ اس انڈسٹری میں کوئی بھی نہیں لے سکتا، مسٹر پرفیکشنسٹ فوٹو: فائل

 ممبئی: بالی ووڈ کے مسٹرپرفیکشنسٹ نے انکشاف کیا ہے کہ انہیں فلم روبورٹ کے سیکوئل ’2.0‘ میں رجنتی کانت کا کردار ادا کرنے کی پیشکش ہوئی تھی لیکن انہوں نے انکار کردیا۔

بالی ووڈ کی سائنس فکشن فلم روبورٹ کے پہلے سیکوئل میں لیجنڈ اداکار رجنی کانت کی اداکاری کو شائقین نے بے حد سراہا یا اور فلم کی باکس آفس پر کامیابی کے بعد ہدایت کار شنکر نے فلم کا سیکوئل بنانے کا اعلان کیا تاہم حیران کن طور پر اس میں رجنتی کانت کا رول کسی اور کو آفر کیا گیا  اور اس راز سے عامر خان نے حالیہ انٹریو میں پردہ اٹھایا۔

بھارتی میڈیا رپورٹس کے مطابق ایک انٹریو میں بالی ووڈ کے سپر اسٹار عامر خان کا کہنا تھا کہ ہدایت کار شنکر نے فلم ’2.0‘ میں کام کرنے کی پیش کش کی  اور اکشے کمار نہیں بلکہ  رجنتی کانت کا کردار کرنے کے لیے کہا گیا حالانکہ شنکر میرے پسندیدہ ہدایت کار ہیں لیکن میں نے فلم کرنے سے انکار کردیا  کیوں کہ رجنتی کانت کی جگہ اس انڈسٹری میں کوئی بھی نہیں لے سکتا۔

اس خبر کو بھی پڑھیں؛ عامر خان کس کی اداکاری سے متاثر؟

عامر خان کا کہنا تھا کہ فلم ’2.0‘ ایک بلاگ بسٹر فلم ہے اور یہ اگلے پچھلے تمام ریکارڈ توڑ دے گی اور مجھے رجنتی کانت نے خود کہا کہ ان کی طبیعت اب زیادہ بہتر نہیں رہتی اس لیے یہ کردار عامر خان کو ہی کرنا چاہیے لیکن اس کے باوجود میں نے فلم کرنے سے انکار کیا کیوں کہ میں جب جب  آنکھیں بند کرتا ہوں، مجھے اس کردار میں صرف رجنتی کانت ہی نظر آتے ہیں اس لیے میں یہ کردار کبھی بھی نہیں کرسکتا۔

واضح رہے فلم ’2.0‘ میں رجنتی کانت کے ساتھ اکشے کمار اور ایمی جیکسن بھی اہم کردار ادا کررہے ہیں جب کہ فلم آئندہ سال سینما گھروں کی زینت بنے گی۔

سائرہ شہروز کے انکار پر ماورا حسین ”جوانی پھر نہیں آنی 2 “ میں کاسٹ

حمزہ علی عباسی کی جگہ کاسٹ ہونے والے فہد مصطفی نئے کردار میں دکھائی دیں گے۔ فوٹو: فائل

حمزہ علی عباسی کی جگہ کاسٹ ہونے والے فہد مصطفی نئے کردار میں دکھائی دیں گے۔ فوٹو: فائل

کراچی: اداکارہ سائرہ شہروز کے انکار پر ماورا حسین کو فلم”جوانی پھر نہیں آنی 2 “ میں کاسٹ کر لیا گیا۔

فلم ”جوانی پھر نہیں آنی“ کے سیکوئل میں بھی اسٹار کاسٹ شامل ہے، جس میں ہمایوں سعید، واسع چوہدری اور احمد علی بٹ اپنے پرانے کرداروں میں ہی نظر آئیں گے تاہم حمزہ علی عباسی فلم کی کاسٹ میں شامل نہیں ہیں جب کہ ان کی جگہ کاسٹ ہونے والے فہد مصطفی نئے کردار میں دکھائی دیں گے۔ سائرہ شہروزبھی فلم کی کاسٹ کا حصہ تھی لیکن حالیہ گردش کرتی خبروں کے مطابق ان کی جگہ ماورہ حسین کو فلم میں شامل کرلیا گیا ہے۔ ذرائع کا کہنا ہے کہ سائرہ شہروز کے کردار کے لیے ہی ماورا حسین کو کاسٹ کیا گیا ہے۔

ایکسپریس سے خصوصی بات کرتے ہوئے سائرہ شہروز کا کہنا تھا کہ میں نے خود فلم کرنے سے انکار کیا کیونکہ مجھے ایسا محسوس ہورہا تھا کہ جوکردار مجھے آفر کیا گیا ہے وہ بلکل جاندار نہیں۔ انہوں نے کہا کہ ڈائریکٹر ندیم بیگ کا شمار بہترین ڈائریکٹرز میں ہوتا ہے تاہم کردار نہ پسند آنے کے باعث انہیں انکار کیا جب کہ ہم بہت جلد مستقبل میں ساتھ کام کریں گے۔

سائرہ شہروز نے رواں سال فلم ”چلے تھے ساتھ“ کے ساتھ فلمی سفر کا آغاز کیا، فلم باکس آفس پر کوئی خاطر خواہ کام نہ کرسکی تاہم ان کی مضبوط اور دل چھو جانے والی پرفارمنس نے انہیں کافی پذیرائی دلوائی جب کہ ادکارہ کی دوسری فلم ”پروجیکٹ غازی“ کو تکنیکی خرابی کے باعث تاخیرکا سامنا ہے۔

دوسری جانب ماورا حسین کی یہ پہلی پاکستانی فلم ہوگی، وہ اس سے قبل بالی وڈ میں ’صنم تیری قسم‘ فلم کے ساتھ ڈیبیو کرچکی ہیں جو 2016 میں ریلیز ہوئی تھی۔

شاہ رخ  کا سلمان خان کی بہن کو شاندار تحفہ

 شاہ رخ خان نے ارپیتا سے وعدہ کیا ہے کہ وہ ان کے شوہر آیوش کی نئی فلم کی تشہیر میں بھرپور مدد کریں گے؛فوٹوفائل

شاہ رخ خان نے ارپیتا سے وعدہ کیا ہے کہ وہ ان کے شوہر آیوش کی نئی فلم کی تشہیر میں بھرپور مدد کریں گے؛فوٹوفائل

ممبئی: بالی ووڈ کنگ شاہ رخ خان نے دیوالی کے موقعے پرسلمان خان کی بہن ارپیتا خان سے وعدہ کیا ہے کہ وہ ارپیتا کے شوہر آیوش کی نئی فلم  کی تشہیر میں ان کی بھرپور مدد کریں گے۔

بھارتی فلم انڈسٹری کے دبنگ خان کی چھوٹی بہن ارپیتا خان صرف سلمان کی نہیں بلکہ پورے بالی ووڈ کی بہن ہیں۔ بالی ووڈ سے تعلق رکھنے والے تمام فنکار ارپیتا خان کو اپنی بہن مانتے ہیں اوران سے بےانتہا پیار کرتے ہیں۔ بالی ووڈ کنگ شاہ رخ خان  بھی ارپیتا کو اپنی سگی بہنوں کی طرح چاہتے ہیں اور ان کی کوئی بات نہیں ٹالتے۔

اس خبرکوبھی پڑھیں: سلمان خان کے خلاف بغاوت

بھارتی میڈیا کے مطابق ارپیتا خان کے شوہرآیوش شرما بہت جلد بالی ووڈ میں انٹری دینے جارہے ہیں اورارپیتا چاہتی ہیں کہ شاہ رخ خان آیوش کی فلم کی پروموشن کریں۔ اداکار سلمان خان کو بالی ووڈ کا ’’گاڈ فادر‘‘کہا جاتا ہے۔ انہوں نے کترینہ کیف، زرین خان، سوناکشی سنہا اور ڈیزی شاہ سمیت متعدد اداکاراؤں کو فلموں میں متعارف کروایا ہےاور اب وہ اپنی بہن ارپیتا کے شوہر آیوش شرما کو فلموں میں متعارف کرانے جارہے ہیں۔ سلمان خان نے کامیاب ترین بھارتی پنجابی فلم ’’جٹ اینڈ جولیٹ‘‘کے حقوق خرید لیے ہیں اور اس فلم کو دوبارہ ہندی میں بنارہے ہیں۔ فلم کے ہندی ری میک میں آیوش شرما اور بھارتی ٹی وی کے مقبول ترین شو’’ناگن‘‘کی اداکارہ مونی رائے مرکزی کردار ادا کریں گی۔

اس خبرکوبھی پڑھیں: پریانکا نے سلمان خان سے ٹکر لے لی

گزشتہ روزارپیتا خان کے گھر دی جانے والی دیوالی کی پارٹی میں شاہ رخ خان سمیت بالی ووڈ کے متعدد اداکاروں نے شرکت کی۔ اس موقع پرارپیتا نے شاہ رخ خان سے دیوالی کے تحفے کے طورپردرخواست کرتے ہوئے کہا ہے کہ شاہ رخ ان کے شوہر کی نئی فلم کی پرموشن میں حصہ لیں، ارپیتا کی اس درخواست کو شاہ رخ خان نے فوراً مان لیااوران سے وعدہ کیا ہے کہ وہ اپنے مصروف شیڈول سے وقت نکال کر فلم کی  تشہیر میں ضرور حصہ لیں گے۔

واضح رہے کہ فلم کی کہانی پنجاب کے گاؤں کے نوجوان کے گرد گھومتی ہے جو کینیڈا کی شہریت حاصل کرنے کے لیے ایک کینیڈین لڑکی سے شادی کرلیتا ہے۔ فلم کی شوٹنگ جلد ہی شروع کی جائے گی۔

تنازعات کے باعث خبروں میں رہنے والی پاکستانی اداکارائیں

پاکستانی شوبز انڈسٹری ایسے اداکاروں سے بھری پڑی ہے جو اپنے اسکینڈلز کے باعث خبروں کی زینت بنے ؛فوٹوفائل

پاکستانی شوبز انڈسٹری ایسے اداکاروں سے بھری پڑی ہے جو اپنے اسکینڈلز کے باعث خبروں کی زینت بنے ؛فوٹوفائل

کراچی: شوبز میں کام کرتے ہوئے تنازعات سے دوررہنا بہت مشکل کام ہے، بالی ووڈ ہو یا لالی ووڈ دونوں انڈسٹریوں کے اداکار کسی نہ کسی  تنازعے کا شکار رہے ہیں۔

پاکستانی شوبزانڈسٹری ایسی اداکاراؤں سے بھری پڑی ہے جو اپنے اسکینڈلز کے باعث خبروں کی زینت بنے، جن میں اداکارہ وینا ملک، میرا، نور بخاری، قندیل بلوچ اورماہرہ خان وغیرہ شامل ہیں۔ وینا ملک اورقندیل بلوچ کی شہرت تو پاکستان سے نکل کربین الاقوامی میڈیا تک پہنچ چکی تھی۔ تاہم وینا ملک شادی کے بعد کافی تبدیل ہوگئی ہیں لیکن اب بھی پاکستان میں ایسی بہت سی اداکارائیں ہیں جومختلف تنازعات کا شکار ہوتی رہتی ہیں جس کی مثال اداکارہ ماہرہ خان ہیں۔

اس خبرکوبھی پڑھیں: نورکی حجاب میں ملبوس تصاویروائرل

ماہرہ خان:

پاکستانی اداکارہ ماہرہ خان نے کیرئیر کی شروعات ٹی وی پر بطور’’وی جے‘‘ کی تھی اور لگاتار محنت کے بعد وہ نہ صرف پاکستان کی بلکہ بھارت کی بھی صف اول کی اداکارہ بن چکی ہیں۔ ماہرہ کافی طویل عرصے سے شوبز سے وابستہ ہیں۔ اپنے شوہرعلی عسکری سے علیحدگی کے علاوہ ان کا کوئی اوراسکینڈل سامنے نہیں آیا تاہم چند روز قبل ماہرہ اس وقت شہ سرخیوں کی زینت بن گئیں جب رنبیر کپور کے ساتھ نیویارک کی سڑکوں پرسگریٹ پیتے ہوئے ان کی چند تصاویر وائرل ہوئیں۔ لوگوں نے نہ صرف ماہرہ کو تنقید کا نشانہ بنایا بلکہ انہیں متنازعہ لباس پہننے پرخوب کھری کھری سنائیں تاہم ماہرہ خان کا اس بارے میں فی الحال کوئی بیان سامنے نہیں آیا۔

صبا قمر:

پاکستانی اداکارہ صباقمرنے رواں سال فلم ’’ہندی میڈیم‘‘کے ذریعے بالی ووڈ میں قدم رکھا تھا، فلم میں جانداراداکاری کرنے کے باعث وہ بالی ووڈ فلمسازوں اور بھارتی عوام کے دلوں میں جگہ بنانے میں کامیاب ہوگئیں۔ تاہم 2015 میں صبا اس وقت تنازعے کا شکار ہوگئیں جب شوکی میزبان نے ان سے پوچھا کہ کیا آپ بالی ووڈ اداکارہرتیک روشن سے شادی کریں گی جس کے جواب میں صبا نے کہا کہ ’’دوبچوں کے باپ سے کون شادی کرنا چاہے گا‘‘اس کے علاوہ انہوں نے رتیش دیش مکھ کی تصویردیکھ کر کہا’’میں پاکستان کی اے کلاس کی اداکارہ ہوں اورصرف اے کلاس کے اداکاروں کے ساتھ کام کرنا پسند کرتی ہوں‘‘۔ اس پروگرام کے بعد صبا قمرپر بھارتی میڈیا میں شدید تنقید کی گئی۔

میرا:

پاکستانی اداکارہ میرا کو ’’اسکینڈل کوئین‘‘کہا جائے تو غلط نہ ہوگا، اپنی گلابی انگریزی اور بے باک بیانات کے باعث وہ پاکستانی میڈیا پرتو چھائی رہتی ہیں تاہم 2005 میں بھارتی فلم’’نظر‘‘میں بولڈ کردارا ادکرنے کے بعد میرا پاکستان کی متنازعہ ترین اداکارہ بن گئیں۔ فلموں میں بے باک مناظر کی عکسبندی کر نے کے علاوہ میرا شادی کے خبروں پر بھی تنازعات کا شکار رہی ہیں، بزنس مین عتیق الرحمان نے میرا کے پہلے شوہر ہونے کا دعویٰ کرتے ہوئے الزام لگایا تھا کہ میرا نے ان سے طلاق لیے بغیر دوسری شادی کی ہے۔

وینا ملک:

اداکاروینا ملک پاکستان کی متنازعہ ترین شخصیات کی فہرست میں اول نمبر پر ہیں، بھارتی ٹی وی کے شو بگ باس سیزن4 میں شرکت کرنے اور شو کے دوران بھارتی اداکاراشمیت پٹیل کے ساتھ تعلقات کی خبروں نے وینا ملک کو راتوں رات اسکینڈل کوئین بنادیاتھا۔ اس کے علاوہ انہوں نے کئی بھارتی فلموں میں آئٹم نمبر کرنے کے ساتھ بولڈ کرداراداکئے، حد سے زیادہ تنازعات کے بعد وینا ملک نے اچانک شوبز چھوڑنے کا فیصلہ کیا اوراب وہ اپنے شوہراوردوبچوں کے ساتھ ایک خوشگوار زندگی گزاررہی ہیں۔

نوربخاری:

پاکستانی اداکارہ نور بخاری بھی کچھ کم نہیں، چار شادیوں اورطلاق کے باعث نور آج کل خوب میڈیا پر چھائی ہوئی ہیں۔ اپنے چوتھے شوہرولی حامد خان کے ساتھ خلع لینے بعد نورکےاچانک شوبز چھوڑ کرحجاب لینے اورصرف مذہبی پروگرام کرنےکے فیصلے نے ان کے مداحوں کوحیران پریشان کردیا، تاہم نور نے اپنی بات کو سچ ثابت کرنے کے لیےحال ہی میں انسٹاگرام پرحجاب میں ملبوس اپنی چند تصاویربھی جاری کی ہیں۔

ایان علی:

پاکستانی ٹاپ ماڈل ایان علی کو 14 مارچ 2015 کواسلام آباد کے بے نظیر انٹرنیشنل ائیرپورٹ سے اس وقت گرفتارکیا گیا جب وہ نجی ائیرلائن کی پرواز سے دبئی جارہی تھیں، ائیرپورٹ پرکسٹم حکام کی تلاشی کےدوران ان کے بیگ کے خفیہ خانوں سے 5 لاکھ ڈالرز کی رقم برآمد ہوئی۔ ایان علی کو ائیرپورٹ سے ہی منی لانڈرنگ کیس میں گرفتار کرلیاگیا، ایان علی گزشتہ دوسال سے منی لانڈرنگ کیس کی پیشیاں بھگت رہی ہیں اوراسی کیس میں کئی ماہ جیل کی ہوا بھی کھا چکی ہیں۔

قندیل بلوچ:

یوٹیوب اورفیس بک پر متنازعہ ویڈیوز شیئر کرکے شہرت حاصل کرنے والی اداکارہ وماڈل قندیل بلوچ کا اصل نام فوزیہ عظیم تھا۔ قندیل بلوچ ’’پاکستان آئیڈیل‘‘ نامی شو میں بھی شرکت کرچکی تھیں۔ تاہم وہ وہاں اپنی گلوکاری کی وجہ سے نہیں بلکہ بے باک اور منہ پھٹ انداز کی وجہ سے زیادہ مشہور ہوئیں۔ قندیل پاکستان تحریک انصاف کے چیئرمین عمران خان سے شادی کی خواہشمند تھیں اور میڈیا کے سامنےعمران خان کے لیے کئی باراپنی محبت کا برملا اظہار بھی کرچکی تھیں۔ قندیل بلوچ جب تک حیات رہیں سوشل میڈیا صارفین کی جانب سے ان پرتنقید کی جاتی رہی۔ تاہم گزشتہ برس ان کے بھائی وسیم نے انہیں گلا دباکرغیرت کے نام پر قتل کردیا۔

اداکارہ نیلی:

پاکستانی اداکارہ نیلی کا اصل نام ’’نیلوفر‘‘تھا، لیکن انہوں نے شوبز میں’’نیلی‘‘ کے نام سے شہرت حاصل کی، اداکارہ نیلی کی آنکھوں کا رنگ نیلا نہیں تھا بلکہ وہ نیلے رنگ کے لینس استعمال کرتی تھیں۔ پاکستانی فلموں میں اداکارہ نیلی اور جاوید شیخ کی جوڑی بے حد پسند کی گئی دونوں نے ایک ساتھ کئی فلموں میں کام کیا، نیلی کا اسکینڈل جاوید شیخ کے ساتھ بہت مقبول ہوا۔

اداکارہ زیبا بختیار:

پاکستان کے شہر کوئٹہ سےتعلق رکھنے والی نامور پاکستانی اداکارہ زیبا بختیار نے حادثاتی طور پر شوبز میں قدم رکھا بعد ازاں وہ پاکستانی شوبز کی پہچان بن گئیں۔پاکستان ٹیلی ویژن کے ڈرامے ’’انار کلی‘‘سے اپنے فنی سفر کا آغاز کرنےوالی زیبا بختیار کو بھارتی فلم ’’حنا‘‘میں مرکزی کردار ادا کرنے پر دنیا بھر میں شہرت حاصل ہوئی۔ فنی کیرئیر میں کامیابیاں سمیٹنے والی زیبا بختیار کی ازدواجی زندگی نشیب وفراز کا شکار رہی ہے، زیبا بختیار  گلوکار عدان سمیع خان کے ساتھ شادی اور پھر طلاق کے باعث میڈیا کی خبروں کا مرکز رہیں۔ فلم ’’سرگم‘‘کی شوٹنگ کے دوران دونوں ایک دوسرے کے قریب آئے اور شادی کے بندھن میں بندھ گئے تاہم یہ شادی زیادہ عرصہ نہ چل سکی اوراس کا خاتمہ طلاق پر ہوا۔ دونوں کا ایک بیٹا اذان خان ہے جو اپنی والدہ کے ساتھ ہی رہتا ہے۔

سلمیٰ آغا:

برطانوی شہریت رکھنے والی اداکارہ سلمیٰ آغاکی والدہ کا تعلق بھارتی پنجاب کے شہرامرتسر سے ہے جب کہ ان کے والد ایرانی نژاد تھے۔ سلمیٰ آغا کو شہرت فلم ’’نکاح‘‘سے ملی تھی۔ اس فلم کے لیے انہیں فلم فیئرایوارڈ سے بھی نوازا گیا تھا۔ سلمیٰ آغا 1989 میں پاکستانی اسکواش کے کھلاڑی رحمت خان سے شادی کی وجہ سے خبروں کی زد میں رہی تھیں، لیکن یہ شادی کامیاب نہ ہوسکی، اس کے بعد انہوں نے دبئی کے بزنس مین منظر شاہ سے شادی کی۔ رحمت خان کے سلمیٰ آغا سے دو بچے ہیں ساشا آغااورعلی آغا خان۔ سلمیٰ آغا کی بیٹی ساشا آغا بھارتی اداکارارجن کپور کے ساتھ فلم’’اورنگزیب‘‘میں کام کرچکی ہیں تاہم وہ اپنی فلموں کے بجائے انٹرنیٹ پر وائرل ہونے والے ایک ایم ایم ایس کی وجہ سے خبروں کی زد میں رہی تھیں اس کے علاوہ ان کی ولدیت پر بھی سوال اٹھے تھے۔ اس کے علاوہ انہوں نےاپنی والدہ کے خلاف جاکر موسیقار سچن گپتا کے ساتھ خفیہ شادی کی تھی۔

فلم ’’سیکریٹ سپر اسٹار‘‘ کے معاملے پر کمال رشید اور عامر خان کے درمیان تنازع

ٹوئٹر نے کمال رشید خان کا اکاؤنٹ معطل کیا جس کا الزام اداکار نے عامر خان پر لگادیا۔ فوٹو : فائل

ٹوئٹر نے کمال رشید خان کا اکاؤنٹ معطل کیا جس کا الزام اداکار نے عامر خان پر لگادیا۔ فوٹو : فائل

 ممبئی: بھارتی فلم انڈسٹری کے متنازع اداکار کمال رشید خان عرف  کے آر کے اور بالی ووڈ اسٹار عامر خان کے درمیان تنازعات سامنے آگئے۔

میڈیا رپورٹس کے مطابق خود ساختہ تجزیہ نگار کمال رشید خان نے عامر خان کی نئی فلم سیکریٹ سپر اسٹار کے حوالے سے سماجی رابطوں کی ویب سائٹ ٹوئٹر پر منفی ریمارکس لکھے جس کے بعد ٹوئٹر نے ان کا اکاؤنٹ معطل کردیا تاہم کے آر کے نے اس کا الزام عامر خان پر لگادیا۔

عامر خان کی فلم سیکریٹ سپر اسٹار 19 اکتوبر کو دیوالی کے موقع پر ریلیز کی گئی ہے جب کہ کمال رشید خان نے ایک روز قبل ٹوئٹر پر اس فلم کے حوالے سے تجزیہ جاری کیا۔ رپورٹس کے مطابق کمال رشید نے اپنی ٹوئٹ میں فلم کا کلائمکس افشاء کردیا جس کی وجہ سے ٹوئٹر نے ان کا اکاؤنٹ معطل کیا۔

کمال رشید خان کا کہنا تھا کہ ٹوئٹر نے ان کا اکاؤنٹ اس لیے معطل کیا کیوں کہ انہوں نے  فلم کے حوالے سے منفی ریمارکس دیے اور وہ ٹوئٹر کے خلاف قانونی چارہ جوئی کریں گے۔ کمال خان نے کہا کہ اگر ٹوئٹر نے ان کا اکاؤنٹ بحال نہیں کیا تو وہ دوبارہ کبھی ٹوئٹر پر اکاؤنٹ نہیں بنائیں گے اور اس کا بائیکاٹ کریں گے۔

ان کا مزید کہنا تھا کہ ’’میں نے اپنے چار سال اور بہت سارا پیسہ خرچ کرکے ٹوئٹر پر 60 لاکھ کے قریب فالوورز بنائے لہٰذا میں ٹوئٹر کے خلاف عدالت جاؤں گا اور دعویٰ کروں گا کہ میں نے اب تک جتنا وقت اور پیسہ ٹوئٹر پر خرچ کیا ہے وہ مجھے بطور ہرجانہ واپس کیا جائے۔

کمال رشید خان نے یہ بھی کہا کہ اگر ٹوئٹر محض اس لیے ان کا اکاؤنٹ معطل کررہا ہے کہ عامر خان انہیں ٹوئٹر پر نہیں دیکھنا چاہتے تو یہ حیرت انگیز بات ہے اور اس کا مطلب یہ نکلتا ہے کہ ٹوئٹر کے اصل مالک عامر خان ہیں۔ انہوں نے کہا کہ میں نے کسی کو گالی یا دھمکی نہیں دی اس لیے ٹوئٹر کو کوئی حق نہیں کہ وہ میرا اکاؤنٹ معطل کرے، ایسا کرنے سے قبل انہوں نے مجھے کوئی وارننگ نہیں دی یعنی ٹوئٹر چاہتا ہے کہ صرف عامر خان اسے استعمال کریں۔

خیال رہے کہ کے آر کے ماضی میں بھی متعدد تنازعات کا شکار رہ چکے ہیں۔ گزشتہ برس بھی دیوالی کے موقع پر ٹوئٹر نے ان کا اکاؤنٹ معطل کردیا تھا کیوں کہ اس وقت انہوں نے اجے دیوگن کی فلم ’’شیوے‘‘ کے حوالے سے منفی ریمارکس دیے تھے۔