حمزہ علی عباسی کی فلم ’پروازہے جنون‘ قانونی شکنجے میں پھنس گئی

کراچی: نامورپاکستانی اداکار حمزہ علی عباسی کی فلم ’پرواز ہے جنون‘ ریلیزسے قبل ہی مشکلات کا شکارہوگئی۔

پاکستان ایئرفورس کے تعاون سے بنائی گئی فلم ’پروازہے جنون‘ کا انتظار شائقین بے چینی سے کررہے ہیں۔ فلم میں اداکار حمزہ علی عباسی مرکزی کرداراداکررہے ہیں جب کہ گزشتہ ماہ فلم کا پہلا ٹیزرجاری کیا گیا تھا جس میں حمزہ علی عباسی پاک فضائیہ کے پائلٹ کے روپ میں بے حد شاندار نظر آرہے تھے۔ فلم کے ٹیزر نے ریلیز ہوتے ہی دھوم مچادی تھی تاہم فلم اس وقت مشکلات کاشکار ہوگئی جب فلم کے وارڈ روب اسٹائلسٹ (لباس ڈیزائنر) سومررحمان نے پروڈکشن ہاؤس پر کیس فائل کردیا۔

اس خبرکوبھی پڑھیں: فلم ’پرواز ہے جنون‘ کا پہلا ٹیزر 

سومررحمان نے ایکسپریس ٹریبیون سے بات کرتے ہوئے کہا کہ فلم کے جاری ہونے والے ٹیزر میں ان کا نام ہی شامل نہیں کیا گیا، کیس میں ہونے والی نئی پیش رفت کے مطابق عدالت نے فلم کے کسی بھی طرح کے تشہیری مواد (ٹریلراورٹیزر) کو ریلیزسے روک دیا ہے۔

ڈیزائنر سومررحمان کی جانب سے ایم ڈی فلمزاورایم ڈی پروڈکشنزکے سربراہ اور وائس پریزیڈنٹ کے خلاف کیس 27 اپریل کوفائل کیا گیا تھا جب کہ کیس کی پہلی سماعت 30 اپریل کو ہوئی تھی۔ سومر رحمان کا کہنا ہے کہ سماعت کے دوران عدالت نے حکم جاری کرتے ہوئے پروڈکشن ہاؤس کواگلی سماعت تک  میرے نام کے بغیرفلم کے ٹریلر، ٹیزر، پوسٹر یا گانے کو جاری کرنے سے روک دیا ہے۔

سومر نے ٹیزر میں ان کا نام شامل نہ کیے جانے پر پروڈکشن ہاؤس سے تحریری معافی اور اپنے بقایا جات کی واپسی کا مطالبہ بھی کیا ہے۔ سومر کا مزید کہنا ہے کہ ایم ڈی پروڈکشن ہاؤس کا ریکارڈ ہے کہ وہ نوجوان فنکاروں کی صلاحیتوں کا استحصال کرتے ہیں۔

فلم کو درپیش قانونی مشکلات اور عدالتی حکم کے پیش نظر ابھی تک یہ واضح نہیں ہوسکا ہے کہ فلم اپنے مقررہ وقت پر ریلیز ہوسکے گی یا نہیں۔

اس خبرکوبھی پڑھیں: حمزہ علی عباسی کی نئی فلم کا پوسٹر جاری

واضح رہے کہ ہدایت کار حسیب حسن کی فلم ’پرواز ہے جنون‘میں اداکار حمزہ علی عباسی مرکزی کردار اداکررہے ہیں جبکہ دیگر کاسٹ میں اداکارہ ہانیہ عامر، شمعون عباسی، احد رضامیر، شاز خان اور کبریٰ خان شامل ہیں فلم عیدالفطر کے موقع پر ریلیز کی جائے گی۔

The post حمزہ علی عباسی کی فلم ’پروازہے جنون‘ قانونی شکنجے میں پھنس گئی appeared first on ایکسپریس اردو.

سوشل میڈیا کسی کو راتوں رات سپر اسٹار اور ہیرو کو زیرو بنا دیتا ہے، ریجا علی

 لاہور:  اداکارہ وماڈل ریجا علی نے کہا ہے کہ سوشل میڈیا ایک ایسا میڈیم بن چکا ہے جوکسی عام سے شخص کوراتوںرات سپراسٹار اور کسی معروف شخصیت کوہیرو سے ’’زیرو‘‘ بنا دیتا ہے۔ ۔

’’ایکسپریس‘‘ سے گفتگوکرتے ہوئے ریجا علی نے کہا کہ پاکستان فلم انڈسٹری کے نوجوان فلم میکرز کوبھی اب سوشل میڈیا کی اہمیت کوسمجھنا چاہیے۔ یہ ایک ایسا میڈیم بن چکا ہے جوکسی عام سے شخص کوراتوںرات سپراسٹار اور کسی معروف شخصیت کوہیرو سے ’’زیرو‘‘ بنا دیتا ہے۔ ایسے میں بہت سی دلچسپ کہانیاں، فوٹیج اورواقعات بھی ہمیں دیکھنے کو ملتے ہیں۔

اداکارہ نے کہا کہ اگرہمارے نوجوان فلم میکرز اپنی ذہانت کے ساتھ ان واقعات کواپنی فلموں کاحصہ بنائیں تو یقینا اس سے عوام کی دلچسپی بڑھے گی۔ اس وقت فارمولا ٹائپ کی فلموں کی نہیں بلکہ منفرد اوردلچسپ فلموں کی ضرورت ہے۔ پاکستان میں فلم انڈسٹری کا نیا جنم ہورہا ہے اوریہاں جتنے بھی زیادہ سے زیادہ تجربے کیے جائیں گے، اس کا فائدہ ہی ہو گا۔

ریجا علی نے کہا کہ ایک ہی طرح کی کہانیاں ، موضوعات اب فلم  بینوں کو اپنی جانب متوجہ نہیں کر سکتے۔ ہمارے فلم میکرز کو بھی کچھ نیا انداز متعارف کروانا ہوگا وگرنہ فارمولا فلموں کے ذریعہ ترقی اور بحالی کے خواب دیکھنا درست نہیں ہوگا۔

The post سوشل میڈیا کسی کو راتوں رات سپر اسٹار اور ہیرو کو زیرو بنا دیتا ہے، ریجا علی appeared first on ایکسپریس اردو.

مسلم ماڈل کو حجاب کی وجہ سے بیوٹی مہم کا حصہ بننے سے روک دیا گیا 

لندن: مسلم ماڈل ماریا ادریسی نے انکشاف کیا ہے کہ انہیں حجاب پہننے کے باعث بیوٹی (اشتہاری) مہم میں شامل کرنے سے روک دیا گیا تھا۔ 

لندن سے تعلق رکھنے والی 25 سالہ ماریا ادریسی کا کہنا ہے کہ  انہیں حجاب پہننے کی وجہ سے بیوٹی مہم میں شامل نہیں کیا گیا۔ ماریا نے کہا کہ وہ یہ سن کر صدمے کا شکار ہوگئیں کہ انتظامیہ نے انہیں بورڈ میں اس وجہ سے شامل نہیں کیا کہ وہ حجاب پہننے اور مسلمان ہونے کے باعث کم خواتین کو اپنی جانب مائل کر پائیں گی۔

ایک انٹرویو کے دوران ماریا نے انکشاف کیا کہ انہیں میری شخصیت سے اور میری ماڈلنگ کی قابلیت سے کچھ لینا دینا نہیں، ان کا ماننا ہے کہ میں حجاب پہنتی ہوں اس لیے لوگ ان کے پراڈکٹ (لباس) نہیں خریدیں گے۔

ماریا کا کہنا ہے کہ یہ بیوٹی مہم ان کے لیے ایک بہت بڑی ڈیل تھی لیکن انتظامیہ نے ان کے ساتھ معاہدہ کرنے سے انکار کردیا جس کی وجہ سے وہ ابھی تک صدمے کا شکار ہیں تاہم ماریا نے ان کے ساتھ معاہدے سے انکار کرنے والی آوٹ لیٹ اور بیوٹی برانڈ کا نام بتانے سے گریز کیا۔

ماریا ادریسی جانتی ہیں کہ ایک مسلم خاتون کی کیا ذمہ داریاں ہوتی ہیں اور انہیں کیسے نبھایا جاتا ہے، ایک خاتون نے ماریا کو پیغام دیتے ہوئے کہا ان کا تعلق فرانس کے ایک چھوٹے سے گاؤں سے ہے اور ان کے علاقے میں بھی حجاب پہننے والی خواتین کو جنرل اسٹور پر کام پر نہیں رکھتے۔

واضح رہے کہ ماریا نے پہلی بار 2015 میں اس وقت شہرت حاصل کی جب انہوں نے ایچ اینڈ ایم بیوٹی مہم میں حجاب پہن کر شرکت کی جس کے بعد ادریسی کی حجاب میں ملبوس کئی تصاویر  میگزین اور رسالوں کی زینت بنیں۔

The post مسلم ماڈل کو حجاب کی وجہ سے بیوٹی مہم کا حصہ بننے سے روک دیا گیا  appeared first on ایکسپریس اردو.

سری دیوی کو بعد ازمرگ نیشنل ایوارڈسے نوازدیاگیا

نئی دہلی: بھارتی لیجنڈری اداکارہ سری دیوی کو بعد ازمرگ فلم ’موم‘ میں بہترین اداکاری کرنے پرنیشنل ایوارڈ سے نوازدیا گیا۔

بھارتی دارالحکومت نئی دہلی میں 65 ویں نیشنل ایوارڈ کی تقریب کا انعقاد کیا گیا، تقریب میں آنجہانی اداکارہ سری دیوی کو بہترین اداکارہ کے نیشنل ایوارڈ سے نوازا گیا جو ان کے شوہر ہدایت کاربونی کپور اور ان کی دونوں بیٹیوں خوشی اورجھانوی کپورنے وصول کیا۔

سری دیوی کی بڑی بیٹی جھانوی کپورتقریب میں اپنی ماں کی پسندیدہ ساڑھی زیب تن کرکے شریک ہوئیں۔ سری دیوی کو نیشنل ایوارڈ فلم ’موم‘ میں بہترین اداکاری پر دیا گیا۔ اس فلم میں سری دیوی نے ایسی ماں کا کردارادا کیا تھا جو اپنی بیٹی کے ساتھ زیادتی کرنے والوں کو ان کے انجام تک پہنچاتی ہے۔

اس خبرکوبھی پڑھیں: سری دیوی کوایوارڈ دینے پر بھارت میں تنازع 

اس موقع پر جھانوی کپور نے تقریب میں شرکا سے کہا میں تمام جیوری ممبرز اورحکومت کا شکریہ اداکرنا چاہتی ہوں جنہوں نے میری والدہ کے کام کوسراہا اور انہیں اس ایوارڈ سے نوازا، یہ ہمارے خاندان کیلئے بہت اہم لمحات ہیں۔

واضح رہے کہ سری دیوی دوماہ قبل دبئی میں باتھ ٹب میں ڈوب کرہلاک ہوگئی تھیں ان کی موت پران کے چاہنے والوں سمیت پوری بالی ووڈ انڈسٹری سوگ میں ڈوب گئی تھی۔

سری دیوی کے علاوہ بھارتی فلم انڈسٹری کے ایک اور لیجنڈ اداکار ونود کھنا کو بالی ووڈ کیلئے بہترین خدمات سرانجام دینے پر بھارت کے سب سے بڑے فلمی اعزازدادا صاحب پھالکے ایوارڈ سے نوازا گیا۔ ونود کھنا گزشتہ برس گردوں کے کینسر کے باعث اس دنیا سے رخصت ہوگئے تھے ان کا ایوارڈ ان کے بڑے بیٹے اداکاراکشے کھنا اور اہلیہ کویتا نے وصول کیا۔

The post سری دیوی کو بعد ازمرگ نیشنل ایوارڈسے نوازدیاگیا appeared first on ایکسپریس اردو.

کرشمہ کا سلمان سے تعلق سے متعلق اہم انکشاف

ممبئی: ماضی کی خوبرو اداکارہ کرشمہ کپور نے بالی ووڈ کے سلطان سلمان خان سے اپنے تعلق سے متعلق اہم انکشاف کیا ہے۔

بالی ووڈ کے دبنگ اداکار سلمان خان اور کرشمہ کپور کو 90 کی دہائی کی بہترین جوڑی تصور کیا جاتا تھا اور دونوں نے انڈسٹری کو ’ انداز اپنا اپنا‘، ’بیوی نمبر ون‘  ، ’جیت‘ اور ’جڑواں‘ جیسی ہٹ فلمیں دیں جب کہ سلو میاں کرشمہ کی چھوٹی بہن کرینہ کپور کے ساتھ بھی بلاگ بسٹر فلم ’بجرنگی بھائی جان‘ اور ’باڈی گارڈ‘ میں کام کرچکے ہیں لیکن کرشمہ کا کہنا ہے کہ وہ کرینہ کے نسبت سلمان خان کے زیادہ قریب ہیں۔

بھارتی میڈیا رپورٹس کے مطابق ایک ٹی وی شو میں بات کرتے ہوئے کرشمہ کپور کا کہنا تھا کہ میں نے سلمان خان کے ساتھ بہت اچھا وقت گزارا ہے اور ہمارے درمیان بہت طویل اور اچھے تعلقات رہے ہیں وہ میرے زیادہ قریب ہیں جب کہ کرینہ کپور کو وہ آج بھی بچی ہی سمجھتے ہیں اور اپنی چھوٹی بہن مانتے ہیں۔

مستقبل میں فلموں میں کام کرنے سے متعلق کرشمہ کا کہنا تھا کہ ماضی میں انہوں نے ’بیوی نمبر ون‘ میں کام کیا تھا لیکن اب اگر کوئی ’ممی نمبر ون‘ بنانا چاہے تو وہ اس میں کام کرنا چاہیں گی کیوں کہ وہ اپنے بچوں سے بہت پیار کرتی ہیں اور لوگوں کو ماں کے پیار کے بارے میں بتانا چاہتی ہیں۔

The post کرشمہ کا سلمان سے تعلق سے متعلق اہم انکشاف appeared first on ایکسپریس اردو.

اداکارہ میرا کا پاکستان چھوڑنے کا فیصلہ

 لاہور: اداکارہ میرا نے پاکستان چھوڑ کر امریکا منتقل ہونے کا فیصلہ کرلیا ہے۔

ایکسپریس نیوز سے خصوصی گفتگو کرتے ہوئے اداکارہ میرا نے کہا کہ آئندہ چند دنوں میں امریکا چلی جاؤں گی تاہم پاکستان میرا ملک ہے اور یہاں آتی جاتی رہوں گی جب کہ ملک چھوڑنے کی وجہ سوشل میڈیا کے ذریعے بتاؤں گی۔

اس خبر کو بھی پڑھیں : میرا نے فرفر انگریزی بول کے سب کو حیران کردیا

اسکینڈل کوئین میرا سے جب شادی کے بارے میں سوال کیا گیا تو انہوں نے اس حوالے سے کوئی بھی بات کرنے سے گریز کیا، دوسری جانب شوبز حلقوں کا کہنا ہے کہ اداکارہ میڈیا کے بجائے اب سوشل میڈیا کو اپنا سہارا بنائیں گی۔

The post اداکارہ میرا کا پاکستان چھوڑنے کا فیصلہ appeared first on ایکسپریس اردو.

میشا شفیع کو دھمکیاں موصول، سوشل میڈیا اکاؤنٹس بند کردیے

کراچی: گلوکار علی ظفر پر جنسی ہراسانی کا الزام لگانے والی نامور پاکستانی گلوکارہ و اداکارہ میشا شفیع نےاپنے سوشل میڈیا اکاؤنٹس بند کرنے کی وجہ بتاتے ہوئے کہا کہ دھمکیاں ملنے کے باعث سوشل میڈیا اکاؤنٹس بند کیے۔

میشا شفیع چند روز قبل اپنے فیس بک اور انسٹا گرام اکاؤنٹس بند کرنے کے باعث شدید تنقید کی زد میں آگئی تھیں لہٰذا انہوں نے اپنے اکاؤنٹس بند کرنے کی وجہ خود ہی بتادی۔ میشا کا کہنا ہے کہ علی ظفر پر جنسی ہراسانی کا الزام لگانے کے بعد انہیں سوشل میڈیا پر شدید تنقید کا نشانہ بنایا جارہاتھااور انہیں دھمکیاں دینے کے ساتھ پریشان بھی کیا جارہاتھا۔ لہٰذا وہ خود کو، اپنے گھروالوں کو خاص طور پراپنے دونوں بچوں کو دھمکیاں دینے والوں سے محفوظ رکھنا چاہتی تھی اسلیے انہوں نے اپنا فیس بک اور انسٹاگرام اکاؤنٹ بند کرنےکا فیصلہ کیا تاہم ٹوئٹر اکاؤنٹ ابھی بھی بحال ہے۔

اس خبرکوبھی پڑھیں: علی ظفر اور میشا شفیع میں وجہ تنازع بننے والی ویڈیو منظر عام پر

دوسری جانب میشا شفیع کے وکیل احمد پنسوٹا نے ایک انٹرویو کے دوران میشا کے کینیڈا شفٹ ہونے کی خبروں کی تردیدکرتے ہوئے کہا ہےکہ ان کی موکل یہیں پر رہ کرمقدمات کا سامنا کریں گی۔ وکیل پنسوٹا نے مزید کہا بہت سارے کیسز میں اگر دوسری پارٹی کا کیس کمزور ہو تواس طرح کی افواہیں ان کا کیس مضبوط بنانے میں اہم  کردار ادا کرتی ہیں۔

اس خبرکوبھی پڑھیں: میشا شفیع نے اب تک خاموش رہنے کی وجہ بتادی

پنسوٹا نے میشا شفیع کی کہی ہوئی بات اپنی بات میں شامل کرتے ہوئے کہا میشا ایک آرٹسٹ ہیں اور وہ اپنے کام کیلئے جہاں چاہیں سفر کرسکتی ہیں لیکن وہ کسی بھی ملک میں منتقل ہونے کی منصوبہ بندی نہیں کررہیں۔ پنسوٹا نے یہ انٹرویو اپنے ٹوئٹر اکاؤنٹ پر ری ٹوئٹ کیا ہے۔

The post میشا شفیع کو دھمکیاں موصول، سوشل میڈیا اکاؤنٹس بند کردیے appeared first on ایکسپریس اردو.